高伯新今季受兵變困擾，自大馬主潘蘇通一系列馬拉走後，成績亦受到影響，現時僅得八場頭馬，仲欠八場先至畢到業，唔少馬迷都睇淡佢達標嘅機會。不過近期有支強心針打入呢個馬房，就係有馬主將名下馬匹加盟高廄，呢位馬主就係袁仕傑，佢一拉就拉晒名下嘅「魔幻神駿」同「精壯神駿」入高廄，呢兩隻馬喺上手馬房評分減到過晒龍，只要部署妥當，咁就有機會替高廄帶來頭馬進帳。
講番目前形勢，要爭取合格成績暫時都係要靠一批舊兵源，好似今次第八場隻「傑飛」（圖前駒），馬主安排隻馬返澳洲放草達一年有多，返嚟香港重新投入戰線，以往呢隻馬贏開一千米直路賽，而運去放草前呢隻馬在港成績，兩冠一亞均來自直路賽，但今季重新投入戰線後，馬房同隻馬改戰谷草短途，一來對手會弱啲，二來希望訓練隻馬適應轉彎路程，日後有更多發展機會，起初跑場谷草一千米，因初跑谷戰兼加上久疏戰陣，結果慢閘情況下末段以勁勢追得殿軍，該戰頭馬係「翩翩」。「傑飛」試準呢場後，翌仗增程跑谷草千二米，賽前原本配潘頓，但潘頓當晚身體不適，臨時換上韋達，可能因人關係，竟然冷落到三十七倍開跑，不過，馬匹無因賠率冷落而演出走樣，韋達不徐不疾嘅發揮下，末段二百餘米一股作氣衝刺即輕取一批二班馬。
今次馬房再安排隻馬跑谷草千二米，賽前兩周，馬房刻意替「傑飛」再彈一課泥地1050米大閘，走位9 9 3，起步只係順其自然，但入到直路，鞍上人蔡明紹拉出外檔，即見隻馬自動波搶上，結果衝入一席第三名，距第一、二名馬「一定勁」同「超好玩」唔夠兩個身位，今次雖然排個十二檔跑，但見隻馬狀態依然保持有上佳水準，韋達再騎駕輕就熟，應可替呢隻馬再執多場。