「美麗皇牌」及「運來寶寶」，上周日分別是大熱及次熱門馬列陣三班直路賽，「美麗皇牌」上次由史卓豐角逐直路賽，潘頓經已推庄過一次，結果係潘頓嘅「乘勢好運」取勝，一匹難贏嘅「乘勢好運」，潘頓肯棄「美麗皇牌」而揀騎，足見佢對「美麗皇牌」嘅底蘊幾咁熟。上周同樣情況又再發生一次，潘頓揀咗「運來寶寶」，「美麗皇牌」就用雷神，結果又係潘頓揀騎嘅「運來寶寶」當了主角。一直以來，「美麗」系與潘頓嘅關係十分好，來到季尾，雷神贏馬數目是潘頓嘅一倍，潘頓本身亦要求成績，遇有實力坐騎時，「美麗」系馬多數會放潘頓出外搵食，免得阻人發達。今次夜賽，兩隻出自告東尼馬房嘅「美麗」系馬均由潘頓披甲，一匹係「美麗皇者」、另一匹係「變出美麗」，兩匹三班馬，前者跑千二米，後者跑一哩，正所謂萬變不離其宗，顯然「美麗」系馬最信任嘅搏殺騎師依然係潘頓。呢兩隻「美麗」系馬季內都未交代，其中「變出美麗」上季三捷谷草一哩，鞍上人全由潘頓包辦，而今季「變出美麗」用上潘頓披甲嘅日子唔多，只有三仗，只喺泥地一哩得過第三名，其餘兩次都輸。最近一仗馬房安排吳嘉晉上陣，雖然落敗但走勢非常接近，證明呢隻馬近況已有爭勝水準，所以潘頓又拿拿臨攞番策騎權，大家只要參考一吓「變出美麗」去季三捷谷草一哩嘅威力，今次又點可以唔再捧呢隻馬嘅場，尤其係用上人馬最佳組合。