■呂慧儀香港文匯報訊（記者 植植）呂慧儀昨日擔任「小熊咖啡廳開幕禮」活動嘉賓，活動先由一班活潑好動的小朋友打頭陣作舞蹈表演；其後，呂慧儀與大家分享同囝囝(蟹籽)的生活近況及母親節慶祝活動，更會與眾同樂，與親子家庭大玩遊戲兼大派禮物，共享天倫之樂。而呂慧儀更即席發揮專長，完美演繹喜、怒、哀、樂表情；亦即場發揮藝術細胞，畫出母親節心意卡作贈送，令現場洋溢着一片溫馨愉快氣氛。呂慧儀表示老公黃文迪同兩歲半囝囝黃柏翹都有到場支持，不過囝囝因為瞓着咗而先行走人。呂慧儀表示經常被囝囝纏住：「佢成日霸住我，唔畀爸爸同我講嘢，佢要做傳話。」咁好難再生多個？佢笑住話：「冇乜可能，湊一個都難，現在同個仔拍拖多過同我老公，阿仔係我愛人。」老公想唔想生個女？佢笑謂：「老公想我生個女，想balance，但我唔會畀佢咁着數。」
慧儀指囝囝現在讀N班，學咗唔少古靈精怪事，佢話：「有日阿仔回家，佢用普通話講『媽媽，我愛你』，我冧到溶咗。」問到囝囝咁黐身，返學有沒有喊？佢笑指：「喊咗幾個月，我都驚佢心理有問題，但老師話佢入咗課室幾分鐘就冇嘢，老師話佢好好戲，佢真係戲子。」會唔會畀囝囝入行？呂慧儀就話：「睇通告，簡單都OK，捱更抵夜就唔好，我做佢經理人，或者請埋我，母子檔出動，老公做助手。」母親節將至，呂慧儀指囝囝上年送咗爸爸負責買的花，佢希望今年囝囝可以自己買花送畀佢。