■徐濠縈接受經理人鄭紹康訪問。香港文匯報訊 徐濠縈近日為經理人兼好友鄭紹康打響頭炮，亮相奇妙電視「天下第一Friend」。而阿徐亦交足功課，由A餐B餐、婆媳不和以至和陳奕迅（Eason）屢傳婚變等坊間傳聞一律有問必答。
阿徐淡然說：「成日話我哋分手、離婚，慣晒啦，咪由得人講囉，時間係最好嘅證明，儘管放長雙眼！」阿徐自言和Eason都是絕少睇新聞的人，更加不會將坊間傳聞拿作茶餘飯後話題。阿徐續謂：「好似A餐B餐咁，到現在我都分唔清自己係A餐定B餐，是但啦，至緊要係佢（指陳奕迅）揀啱咗自己嗰個嚏A佢啱食咪得囉！」
至於傳聞她下嫁Eason時，陳家曾大力反對，問婆媳關係仍然惡劣？阿徐聞言掩嘴笑道：「我哋結婚嗰陣，米已成炊，包包（女兒）都已經歲幾啦，仲反對？而且我同奶奶關係好好，佢成日買小禮物畀我，又會帶朋友來舖頭幫襯，咁我當然唔敢收佢錢啦，哈哈！」
Eason鼓勵息影
另外，屢傳阿徐和Eason不和的主要原因是指阿徐大花筒，阿徐聞言打趣說：「咁要問陳奕迅啦！其實我又唔鍾意買珠寶，又唔買名車，如果以強中弱來釐定大花筒，我只係適中囉！當然每個人把尺都唔同，至緊要係身邊嗰個（指Eason）唔覺得你過分！」阿徐頓一頓笑道：「可能佢仲大使過我！」
阿徐回想跟Eason在華星年代認識，當年Eason寂寂無名，今時今日則已成為歌神，阿徐笑道：「有時我哋都會攞返來笑吓，現在無名嗰個係我，我只係Eason嫂！」阿徐最窩心是當年還在無綫時，因為太不喜歡做娛樂圈，Eason好型地對她說：「你撈唔掂㗎啦，等我來啦，趁仲未搬入將軍澳，好走啦！」阿徐爆笑說：「嗰年我27歲，就咁息咗影！」