今次要留神文家良馬房，消息指出，佢目前雖然只得十五場頭馬，牌面仲欠一場畢業，其實佢嘅獎金經已達標，即係話唔使贏足十六場佢今季都可以畢業，不過咁，有邊位練馬師希望咁樣畢業，相信文家良亦唔會，今次佢專登搵咗雷神幫手，希望能接二連三數胡，咁就有機會一晚上岸。其中馬房一對「辣」系馬「辣得寶」及「辣得很」都交由莫雷拉主帥，其實，上次「辣得很」之敗，鞍上人郭能激到倉主紮紮跳，佢自知都大鑊，拚後未幾就向倉主希望獲得將功補過機會，點知呢頭都未箍到煲，嗰頭就即刻有風吹出，呢隻馬將會換人跑，最後得悉就係雷神。由於雷神替「辣得很」披甲，同晚有份出戰嘅半同主馬「辣得寶」都搵埋雷神披甲助陣，所以馬迷必要留意。周一下午接近四點咁滯，「旅遊智者」助手，拍副練阿撈「辣得很」到機坪踱步，踱步後又返馬房地堂教閘，倉主全程盯實隻「辣得很」，緊張程度可想而知，今次夜賽文廄想食「雙辣」，不妨留意動向。
塑料喜副練險燒鬚
嘉琦妹今年唔知係咪行衰運，成績只係中規中矩之餘，陣上麻煩嘢一單接一單，早前驗出佢尿液有問題，最後查明係食感冒藥有關，結果俾馬會競賽小組輕判停賽一日，不過，季內犯唔小心策騎，經已唔止一次半次，嚟緊停賽令將於五月廿八日服刑，至到六月十一日才復出。不過呢個只係頭盤，運滯主菜仲未上演，上個周日尾場小妹騎告東尼隻「上利多」，走位唔夠積極，返嚟輸一位一得第四名，賽後小組更押後研訊，不過，呢劑嘢的確騎得差，背後信佢冇古靈精怪，但如果一旦受罰，相信都唔輕，希望小妹可以大步檻過。當事人都知道大鑊，呢兩日都滿懷心事，入到師父個倉開工，成班手足都安慰佢，副練陳志忠及師父呂健威亦然，雖然犯咗錯，但身邊嘅人都係以鼓勵說話替佢打氣，千祈唔好就此氣餒。
所以小妮子心情稍為放鬆番啲，起碼有師父諒解，另一方面，呂健威用實際行動支持徒弟，排位日周一下午，馬房經已安排「一支梅」由蔣嘉琦拍副練陳志忠隻「塑料喜」，兩隻馬齊齊拍踱十餘分鐘，講狀態兩隻都有水準，「塑料喜」仲差啲令副練老貓燒鬚，拍踱期間起咗火想搶韁，不過陳志忠當然經驗老到，谷起一對老鼠仔大力抽到實一實，講真呢隻馬今季都算黑仔，跑咗八場有五場第二，其中兩場仲係影相輸，今場馬房第一次替呢隻馬出戰谷草一哩，先唔好理隻馬識唔識跑，但可以肯定一樣嘢，谷戰對手冇田戰咁強，有機會贏番場。
一支梅最啱蔣小妹
至於隻「一支梅」，季內由何澤堯負一二一磅贏馬，贏完之後加咗五磅跑即唔同晒樣敗陣，係咪多五磅對呢隻馬嘅影響咁緊要？答案係有一定影響，呢隻短途馬體重得九百幾磅，假如負磅稍重，咁就想贏都難，「一支梅」贏完何澤堯繼續騎，冇再進一步成績交出就係咁嘅原因，今次馬房用小妹上陣，磅位下調至一二三磅接近番贏馬時候負磅，小妹再獲師父賞識，一定唔會令師父丟架，有機會重振雄風，贏得季內第二捷。