香港馬季尚有個半月先結束，但大摩已經放眼下季打吡大賽，透過兒仔喬治頻頻在世界各地替馬主物色良駒，最近大摩就在澳洲購入兩匹三歲馬，其中一匹名叫「地位高」，呢匹馬去年曾在考菲爾德馬場勝出一場二千米三級賽羅便臣錦標，而該場亞軍被大摩引入到港的「火箭駒」，後駒屬「佳龍駒」馬主洪祖杭兒子洪定騰名下，值得一提，「地位高」之前的練馬師甘敏斯，七月將接掌油王高多芬澳洲馬房現正散貨，大摩睇準時機入市認真精打細算，至於另一匹購入的三歲馬，大摩只透露呢匹馬早前曾參戰南澳打吡，連同「地位高」將於七月抵港，另外大摩入貨行動只係剛剛開始，除了會留意住澳洲昆士蘭打吡，亦會在愛爾蘭二千堅尼尋找目標。今日泥地賽事，大摩馬房匹「摩高一丈」來港前名氣甚響亮，但適應水土較慢，惟上仗在泥地跑得第四名已見接近，搵對出路再來估計屆出頭之時。