上個禮拜六何澤堯一早替剛周日出賽馬「天合」於馬房地堂加課，試畢同倉主匯報情況後，佢自己專登到大摩馬房三樓，原來幫師父睇今次夜賽八隻戰馬，而方嘉柏呢八隻戰馬，只係暫時寄放在大摩馬房三樓，近呢兩日經已重新放回馬房地下馬格，方便倉主巡查，當然呢八隻馬並非全部配何澤堯上陣，佢只係獲配「勢必跑」（圖前駒）、「進綵」及「想贏就贏」。其餘實力馬如雷神「雲呢拿」、杜利萊「皇者勝利」、潘明輝「大輝寶」等等一概都唔關佢事，不過年青小伙子真係有師父心，知道馬房部署重兵，得閒即走過大摩呢邊幫手睇馬。何澤堯咁勤力幫師父睇馬，自己有份上陣嗰三隻參戰馬自必然有料到，絕對唔屬下風馬。
咁樣隻二班馬「勢必跑」又點樣睇？今次跑泥地一哩，同場有廄侶泥地王「雲呢拿」一齊列陣，後者用埋雷神，今季亦經已贏過四場，其實，「雲呢拿」及「勢必跑」屬兩父子馬，邊隻贏只係荷包左袋俾右袋，完全無分別。而今場屬二班賽事，季內「雲呢拿」四捷，由四班贏到上二班，現評分已冇乜着數，當然唯一吸引大家捧場，純粹係匹馬泥地性能出色，但如果講實力，「勢必跑」並非喺吨坐U，至於「勢必跑」跑泥地性能好唔好，大家可以睇番呢匹馬今季跑過場二班泥賽嘅成績，雖然僅得第六，但輸俾該場頭馬「活力寶」只係三個身位，咁即係講亦都唔差，再睇睇「勢必跑」季內仲贏緊一班賽，所以大家只要比較一下，「勢必跑」今場絕非吶喊助威角色。
進綵班分皆有優勢
列陣第四場四班一哩隻「進綵」，上季仲喺三班贏馬，但今季卻無一場取得上名，而減分方面，經已落到第四班，目前被評嘅四十四分，比起上季最高分時嘅八十六分，幾乎減咗一半分咁滯，所以你哋話幾咁着數，今次跑泥地一哩，過往一戰大敗廿多個馬位，純粹係當時毫無狀態及水準之作，而今有評分之利，狀態亦已具備戰鬥水準，作為半冷門一敲都值得。
想贏就贏備戰積極
另一隻由何澤堯披甲之「想贏就贏」，跑第一場四班千八米，呢隻馬季內亦見得唔少，近幾場才稍稍有回落感覺，今季早前已有七場上名成績交出，合共有兩冠一亞四季表現，贏馬路程屬兩場谷草一哩，今次點解偏偏揀場泥地千八米列陣？當然呢隻馬跑泥地亦有多少根據，曾經喺呢個路程得第三，輸俾「騂龍」及「連利進寶」腳下。當「想贏就贏」三月中勝後，最近三仗馬房已冇乜點再催谷，所以陣上成績亦滑落，今次賽前見番呢隻馬彈課泥閘，準備工夫又有搏殺跡象，呢隻馬又回復爭勝水準，大家千祈咪以為隻馬今季經已收工，相信收季之前仲有一輪攻勢。
當然，除何澤堯呢三隻馬要留意外，其他方廄馬都要留意，因為前日方仔專登安排四隻馬到馬醫院抽血兼照鼻，分別係「皇者勝利」、「雲呢拿」、「大輝寶」及「想贏就贏」，除何澤堯騎「想贏就贏」之外，其餘三隻馬都用唔同騎師上陣，一樣要留神。