所有區議員都會話「民生無小事」，但對某部分區議員嚟講，鬥掛橫額同爭功勞先至係大事。立法會新界東極大可能舉行補選，各有意參選者以至其「樁腳」已經開打。有意參加補選的范國威、鄭家富、方國珊，其「馬仔」黎銘澤、陳展浚同張美雄近日就喺網上打口水戰，焦點又係話有人亂掛橫額、扮「成功」爭取等等，仲四周巡去影人「罪證」，區議員係咪真係咁得閒呀？難怪唔少居民大嘆，係咪區內已經冇晒民生問題要佢哋用精力去處理，所以呢啲議員先咁多時間去為雞毛蒜皮嘅事嘥時間去狗咬狗骨呢？■香港文匯報記者 羅旦
鄭家富的「樁腳」、前民主黨成員陳展浚，早前為掛橫額一事與同樣有意參加補選的「新民主同盟」范國威的「馬仔」、現任軍寶區區議員黎銘澤在fb發爆發罵戰。近日，阿陳生向方國珊發炮，話尚德邨居民長年飽受冷氣機滴水、高空擲物困擾，而晾衫架位於廚房，部分人就在尚德廣明附近的大草地晾曬衣物，但「康城方議員（方國珊）竟然投訴」、「雖然係（喺）公眾地方晾曬係會影響市容，但如果倒果為因嘅（話），作為議員真係好過份（分）」等等。
違規掛橫額被拍照成「罪證」
方國珊的拍檔，環保南區議員張美雄其後發帖反擊，攞返陳展浚俾黎銘澤投訴違規掛橫額一事來講，並上載了一張陳和鄭家富掛街頭橫額的照片作為證據：「黎議員（黎銘澤），唔單止你受害。呢位陳生違規的Banner掛完石角路之後，再掛首都。全區都見到佢違規Banner的足跡，請自重吧！」
陳展浚也不甘示弱，在fb連發兩帖，先再打黎銘澤：「黎生一百步笑人五十步都算，仲要走去違掛安全島，影響交通安全，阻礙行車視線，新同盟就係自己點做都得 人吔（哋）就唔得！」他同日上載了張和方國珊掛在街頭的橫額照片，標註道「補選近了你們應當悔改」，話方國珊同張美雄「雙重標準」，「你吔（哋）係違規嘅始祖走去話人違規。」
張美雄還拖 罵陳展浚「無恥」
張美雄就借第二件事還拖。佢上載了陳展浚話康城站設立恒生理財中心後，將會繼續保留櫃員機的單張，及「回帶」稱此事是他在去年9月10日去信後「成功爭取」得來的，話陳展浚「邀功」是「人無恥則無敵」：「星期二出左（咗）個post講解康城站店舖安排，點知今日俾陳生照抄印單張派，仲懶到連內容都無改，圖片也照Copy......陳生連信都無出過，周圍話自己成功爭取恆（恒）生銀行櫃員機，無恥的程度比禮義廉更甚。」
陳反擊 鬧張無故製造事端
陳展浚就鬧張美雄無故製造事端，發帖稱：「康城站新店舖安排，早於五月在康城各討論區已經公佈，並非什麼獨家資訊。請問是否任何人一出post，便佔領了該議題，任何人提及便是不能呢？況且恆（恒）生新櫃員機剛啓用，很多居民搞不清楚，所以小弟以資訊形式向居民滙報，並沒有稱什麼成功爭取，更有不少街坊證實我沒有說。......希望大家為社區做事，不要因立場和黨派之分，無理抹黑攻擊其他人。」
沙田區議員、「新退黨同盟」的麥潤培也加把口批評陳展浚：「呢件垃圾出曬（晒）名垃圾架（㗎）啦！」網民「Hin Leung」則稱：「此組織係偽本土，與鄭家富、（自認『獨派』的沙田區議員）陳國強有關。」
不過，網民「Gary Yau」就留言揶揄：「佢大佬阿方姐（方國珊）咪又係咁上下，不用分那麼細。」「Fred Li」也稱：「兩家人都是單料同（銅）煲，有咩好爭。」「Candy Tong」更批評張美雄：「最怕就係依（𠵱）d（啲）你鬧我我鬧你嘅議員，你真係當普通市民又傻又盲？陳展俊（浚）依（𠵱）d（啲）鬼鼠（祟）人大家都知，反而張美雄依（𠵱）次真係自暴其短！」
各區議員咁樣打來打去，相信到補選會更精彩。唔係住將軍澳嘅，可以食花生食得好開心，但對將軍澳居民嚟講，就真係唔知畀咩反應好囉！
