莫雷拉剛周日賽事憑「爆騷」及「太陽旺旺」起個孖寶，當贏出「太陽旺旺」後，今季佢經已勝出第169場頭馬，破咗坉茪H紀錄，呢位冠軍級騎師近期開咗個「臉書」，直接同馬迷對話，而且佢開場白都學咗幾句廣東話，短短幾句說話介紹自己，佢話會將贏馬樂趣同大家分享。雖然唔少練馬師同騎師都有「臉書」，但大多數都係私人性質，偶然有一兩個練馬師所開嘅「臉書」，都係鋪下自己馬房啲威水史，單向居多，直接互動可能雷神係第一個。
講番呢位神級騎手，頭馬紀錄經已破咗，接住呢兩個賽馬日只係自己跑自己，有個特點大家要留意，就係雷神好鍾意向難度挑戰，有啲馬唔係咁易贏，佢又肯接嚟騎，呢類馬匹自然唔可以睇少，講番上周日佢贏嗰兩場馬，「爆騷」同「太陽旺旺」，前者要向隻唔夠兩倍嘅「幸運大師」挑戰，而嗰隻「太陽旺旺」十九蚊獨贏取勝，但睇雷神贏馬過程，騎少一步都未必贏得，所以睇雷神贏馬可以話賞心悅目。呢次夜馬雷神騎文家良隻「靚猴王」（圖10號），呢隻馬季初曾經喺田草千二米取得一冠一季成績，都係由田泰安策騎，從過往賽績所見，呢隻「靚猴王」最佳射程一定係田草千二米，但季內跑獲一冠一季之後，評分由贏馬時六十七分降番到宜家六十五分都未能再獲得上名成績，隻馬有乜問題，真係要練馬師至知，但可以肯定就係健康無問題，事關有過贏馬及上名表現後嘅「靚猴王」繼續有上陣，不過就冇好成績交出，但最近兩場田草千二米就跑得唔錯，一場跑第四，另一場跑第五名，隻馬放棄煞科日嘅三班千二米而轉戰窄場，更用埋雷神，顯然係睇通谷草對手唔強，計準「靚猴王」現時有分利，相信文家良呢次唔會老點雷神騎隻孭鑊馬啩。