「超然」剛周日未能成為鄭俊偉畢業馬，目前只剩兩個賽馬日，對於呢位練馬師而言，顯然屬一個關鍵時刻，只差一場頭馬便可免去一封警告信，對未來前途當然有好大嘅影響，不過從「超然」嘅部署，練馬師似乎對上岸呢回事處之泰然，所謂欲速則不達，即使用上強配，運氣呢家嘢冇就冇，有時話嚟就嚟，強求亦無用，點解話「超然」睇到練馬師嘅心態，事關隻馬之前兩仗用大師傅得亞，呢次夠膽用個七磅仔巫顯東，雖然都係輸咗，但大家睇到巫顯東嘅發揮已一絕，無奈遇上今季跑出彩虹嘅「飛霞」，真係冇得好講。儘管今次鄭俊偉戰馬牌面唔強，除「堅離地」用沈拿外，其餘三戰「荷蘭風車」配蔣嘉琦、「心好事成」及「創意寶」用賴維銘，全部配一般級數騎師，不過咁唔代表鄭俊偉抱放棄態度，其實兩匹用王牌報名嘅「心好事成」及「創意寶」，一早已卜定賴維銘，「創意寶」係刻意回配賴維銘。隻馬目前喺四班爭勝條件一啲都唔弱，奈何今季八戰僅跑得一席季軍，期間曾經用過雷神操刀，不過多數都係用杜利萊披甲，「創意寶」始終無法跑出水準出來。大家翻查賽績就知「創意寶」對上一次頭馬是配邊位騎師，咪就係賴維銘囉，去季初喺谷草千二米贏「靚先生」。最近一仗「創意寶」經已交回賴維銘披甲，雖敗走勢亦近，今次馬房安排牠跑谷草一千米，對手比上賽減弱，屆時只要賴維銘落足心機發揮，鄭俊偉上岸大可靠佢呢一擊了。