闖「狗檔口」食熱狗掀「二獸戰」 「餘熱」投訴辱華狗咬狗
「獨派」搞事，為今年書展添上一股烏煙瘴氣。一直狙擊「熱狗」的「無敵神駒」仇思達，前晚在「熱狗」書展展位外圍「食熱狗」挑釁，「熱狗前首領」狗達（黃洋達）之妻殘獸慧（陳秀慧）就衝出展位指罵對方，搞了一場大龍鳳。「熱狗」隨即反擊，以「神駒」在今年替他出書的明報出版社展位中唱「辱華歌」為由，向明報以至書展主辦單位貿易發展局投訴並要求交代，掀起網上大罵戰。講真，「獨」真係同毒一樣，掂吓都真係好大鑊。
■香港文匯報記者 羅旦
話說仇思達前晚特意在「熱狗」展位對開的小食檔買了一條熱狗，並和其一眾「益友」走到「熱狗」展位外圍「食熱狗」並直播。正當一眾恥笑聲連連之際，正在展位內的殘獸慧衝出來狂鬧仇思達，話佢此前質疑「熱狗」篤數、呃錢等等都係「抹黑」。
小學雞罵戰 翻舊賬互數
短片可見，殘獸慧向仇思達手指指：「係一定有報應嘅仇思達，我唔係你哋，你放心啦，我唔怕你哋嘅。 我話畀你聽，我係𠵱家兜口兜面鬧你，我唔係好似你啲人咁！」
仇思達口咬熱狗，反唇相譏道：「我就兜口兜面×你啊怕咩啊。」殘獸慧其後又稱：「你講嗰啲嘢係唔啱，你喺度抹黑。」仇思達即揶揄：「講嚟講去都係報應報應，你講咩報應啊？（『熱狗』的展位）都冇晒人。」
仇思達其後發帖「炫耀」其「戰績」：「八婆陳秀慧忽然飛撲出來指罵，情緒激動，連續敗走三次，狀甚有趣。......我傲然屹立，絲毫不動。」
狗達做縮頭龜被恥笑
其「益友」「Zilo Mok」就恥笑「鬼咩，直播篤數，190萬下落不明，反骨，全部都回應唔到，但又唔肯認錯，除咗發神經都無第二招......成班人渣一向都欺善怕惡，你惡過佢佢就會收聲。」，又揶揄當時在場的狗達：「黃洋達坐嚮（響）後面都唔敢出嚟啦。黃洋達就係咁，睇返佢畀游清源質，畀胡穗珊質，只要對方講嘢稍為有啲理據，條廢人就即刻啞口無言，由頭到尾佢就係書生扮古惑仔，推人去死就叻。」
網上晒「戰績」 「無料扮四條」
同一時間，殘獸慧就發帖，恥笑返轉頭：「比（俾）我鬧完冇戲唱敗走∼......踩場連人地（哋）個場都唔夠膽入，要我行出黎（嚟）招呼，......返去紅色出版社（明報出版社）唱歌啦，......係夠膽就一早行入黎（嚟）玩啦，要我行出去，浪費我腳骨力。」
狗達也發帖稱：「畀SauWai Chan一個女人鬧走左（咗），呢d（啲）咁樣都算係嚟（搞）事？笑死朕∼∼」「熱狗」「司徒小龍」更留言話，佢在場就會要仇思達「打橫出去」。
事件越鬧越大，原來仇思達當晚在今年替其出書的明報出版社展位上「唱衰熱狗」。該首名為《契弟榜》的歌中，除了「熱血時報搵人，虛構聽眾過萬人」、「云根，率眾妖害人；熱狗，天理難容忍」等歌詞，其中一句提到「搵夠數，不理『支那人』」。一眾「熱狗」即時到明報出版社的fb洗版，話對方煽動對內地人的仇恨。
黨羽延戰線 fb鍵盤戰
網民「John Tam」稱：「撑明報出版社支持『港獨』！」「Maggie Lau」則稱：「明報出版社作為一間有質素的出版社，為何會容許這種作者存在？他在書展上侮辱其他作家及參展商！」
網名霍由佳的鄭松泰議員辦事處屏山南社區主任鍾雪兒就質問：「請問貴社怕唔怕影響形象？」「水晶姥姥」「Crystal Li Yuen Man」也稱：「明報作者公開高歌『支那人』，挑起兩地人民矛盾。請正面回應。」
「益友」「Lapchun Au」就替「神駒」死雞撐飯蓋：「芝麻人呀，姥姥。傳聞當真味（咪）抄車囉！幾時收返言論呀？幾十歲阿嬋唔好龜縮呀！」「水晶姥姥」反擊：「得啦得啦，鴨脷洲口聲（音）吖嘛。明嘅明嘅。」
「熱狗」刮罪證 「殘獸」告「神駒」？
戰線唔止局限在fb，多名「熱狗」就發起去信貿發局投訴「有某著作的作者（仇思達）在（明報出版社的）書展攤位上唱歌侮辱其他參展書商的作者，並在歌詞中出現『支那』一詞，有辱華之嫌」，要求對方跟進。殘獸慧就話，會考慮告「神駒」，因為就算「神駒」冇錢，都可以同明報出版社「講數」喎！
要講「煽動仇恨」，其實「熱狗」咪一樣，大家不用分得那樣細。其實，睇見呢班人鬥來鬥去，就感覺到「獨」呢家嘢，真係「不可一，不可再」，提提去書展嘅朋友，行過有關展位時留心啲，一下殃及池魚就喊都無謂啦！