■陳寶珠(左三)與沈芝華(右三)前晚到文化中心欣賞粵劇。香港文匯報訊（記者 李思穎）陳寶珠與「七公主」二家姐沈芝華、譚炳文前晚到尖沙咀文化中心欣賞粵劇《花木蘭之巾幗英雌耀木蘭》，寶珠姐甫現身便被戲迷包圍，場面一度混亂。寶珠姐透露兒子楊天經陪太太返加拿大探外母，將會外遊兩星期。問到寶珠姐有否呷醋？她謂：「無，當然要探吓外母啦，我感覺不錯，而且也不是第一次，已經習慣，大家要有各自空間，我閒時便約人食飯和睇劇，9月1日會有慈善演出。」
問到有否催天經造人，她笑說：「唔催得，順其自然，（恨抱孫？）一半一半啦，因現時世界好亂，風氣不好，覺得小朋友將來會好辛苦，（阿仔有計劃嗎？）我諗有計劃。」
炳哥今年3月因心臟問題氣喘入院，前晚他撐着雨傘到來，看來精神不錯，現場更有女戲迷大讚他保養得似60多歲很靚仔，炳哥笑着說：「80幾歲仲靚，精神不算很好，剛剛上樓梯都氣喘，這幾日仲有幾聲咳，身體麻麻哋，好彩仲行得走得，醫生叮囑我不要捱，玩得就玩，不用通頂便沒問題，所以都有做配音，拍廣告、拍戲都可以，最近都有幫港台拍攝，無綫要捱夜就唔制，不過都有客串《溏心風暴3》拍了幾場戲，因家豪哥（監製劉家豪）好就我，可以8、9點放我走。」問到杜琪峯有否邀拍戲，炳哥謂：「我捱唔到夜，去年拍完之後都唔制，一捱夜好難補得番，好似之前拍完港台幾日戲都病倒了。」
問他有否探望老友李香琴，他稱：「已經近11個月無聯絡，無辦法，她唔行得唔走得，（琴姐認到人嗎？）唔知，搵佢都無用，可能佢捱緊苦，費事搵佢啦。」