■如樂基兒(左)想生BB，周汶錡稱會給意見。香港文匯報訊（記者 梁靜儀）名模樂基兒（Gaile）上月底與圈外男友Ian Chu在美國加州舉行婚禮，婚後未有度蜜月便回港工作，昨晚到中環出席品牌活動。問到前夫黎明可有送上祝福？Gaile說：「好似冇，因為我用緊美國的電話，冇留意香港有咩人搵我。」談到造人計劃，Gaile則稱順其自然，不想給自己壓力。
穿上吊帶裙現身的Gaile面帶倦容，她表示婚後病了一星期，所以未有去度蜜月，她說: 「年底會去Safari度蜜月，去睇野外動物，（地點是你揀？）我哋兩個人一齊同意，之前冇去過，想去睇動物。」Gaile透露婚後會與老公在港定居，而婚後感覺亦沒有什麼不同，只是病了，可能是太過緊張所致，因為活動後她還要飛去上海。
談到造人計劃？Gaile表示沒有這個打算，她笑說：「順其自然，冇特別去計劃，冇特別去試，亦唔想畀自己壓力，（隨時可以生？）但真係冇特別去試，老公有冇小朋友都冇所謂。」
談到婚禮最感動的部分？Gaile說：「最感動係見到好多朋友由倫敦、美國、澳洲、香港咁遠飛去出席婚禮，因為嗰個地方真係好遠，同埋收到好多朋友祝福，（有冇講愛的宣言？）兩個都冇講，因為好熱，儀式好快，得兩分鐘。我哋兩個都冇喊。」問到在港可會再相約朋友慶祝？Gaile表示應該不會了，因為都慶祝了一段時間，都已結了婚。Gaile又稱婚後不會減少工作，之後會做關於推廣瑜伽的工作，又會做KOL拍片教人煮食，同香港的頻道亦有初步傾合作，所以好忙。
周汶錡笑2歲兒學化妝
同場出席的還有周汶錡（Kathy）、楊張新悅、陳小韻、Rosemary及Amanda S. 等，真空Deep V西裝上陣的Kathy，指一身中性打扮很適合自己，就連大仔見到都讚她，尤其是她塗上紅色唇膏，他會停止所有活動，走過去望住她，又要她抱抱，然後錫她。Kathy大爆兒子已識學她化妝，已識得夾眼睫毛，又會用粉撲，但她就不會讓兒子塗唇膏，說唇膏是女仔用的，但他就會說：「I'm a girl .」她指大仔已26個月大，有時她換衫出去，就會搞搞震不讓她出去，所以她換衫一定會關門。提到樂基兒最近再婚，Kathy表示恭喜對方，如果她想生BB一定會畀意見。
另外，談到翁為德透過經理人發聲明，力撐老公鄒兆龍近日的出軌傳聞。Kathy說：「最近唔得閒睇，好多嘢都係喺朋友圈中知道，湊仔真係好攰，細仔又病咗。自己識翁為德，我生大仔時，佢都有見面，佢現在喺美國住，湊三個小朋友，媽咪唔易做，感情事唔需要我哋擔心，佢自己會處理。」問到如何維繫夫妻感情？Kathy說：「好難講，（成日要誘惑個老公？）都要的。」