■林峯被360度太空吊臂吊在空中繞場。香港文匯報訊 林峯相隔四年，前晚假廣州國際體育演藝中心舉行《林峯Heart Attack 世界巡迴演唱會》廣州站。林峯打造首個廣州最大的四面台，並以七位數字加多了一台可以360度旋轉的太空吊臂，可以畀林峯於場館上空360度高空飛轉，同觀眾近距離接觸，搞到粉絲喪叫。
林峯每次演出都搵命搏，見紅流血像是他演唱會每次的例牌節目，今次也不例外，為了第一次於廣州用高空吊臂，阿峯演出前三日及早前已經於廣州為這個演唱會進行綵排，綵排期間就因為太拚命用力拉着一個旋轉舞台傷了手，阿峯笑言：「都慣晒，次次演唱會都一定會有事發生，唔見紅唔安落咁。其實好小事，他們有叫過我用皮手套，但係要拉實個圈轉，太滑拉唔住，所以都係冇用，照頂硬上。」
四年沒在廣州開個唱，今次演唱會一開賣已經是爆到七彩，一萬人的場館，據說昨晚超額坐了近萬三人，大會製作更是不惜工本，香港演唱會原汁原味再加一個升華版帶到廣州。
360度太空吊臂全場飛
阿峯表示今次公司連工程人員一百八十人團隊上來廣州，幫他打造首個廣州最大的四面台，另外再重本七位數字加多了一個360度太空吊臂，「我們新加個太空吊臂，可以讓我喺場館上空360度高空飛轉，同觀眾近距離接觸，我都係第一次喺演唱會覺得自己似拍緊超人戲咁，可以吊到咁高，飛到咁遠，又可以倒轉同下個觀眾握手，其實幾好玩，但係我有畏高，被吊上去嗰一刻，我覺得都幾震，觀眾應該都好開心，因為歌迷不停咁尖叫，狂叫，我係上面都聽得一清二楚。」
天天食番薯作代餐
這次演唱會，講明是Heart Attack，阿峯當然不會令觀眾失望，空中飛人之外，又淋水又濕身又爆肌，全部都令到女歌迷血脈沸騰，阿峯話為了展示最佳狀態，他已經三四個月冇啖好食，天天只是食番薯作代餐，所以到演唱會完滿結束，慶功宴上他終於可以飽餐一頓，工作人員一起狂飲一晚香檳慶祝。