■林欣彤希望可以有一個好的時間去排練，希望演唱會可以盡善盡美。林欣彤（Mag）年初加盟王祖藍管理的新經理人公司「手工藝」，相處大半年的「蜜月期」，Mag很多謝祖藍無限量支持，令自己隨心所欲。特別是早前參與音樂劇《我和青天有個秘密》演出，令Mag收穫甚豐，多了空間去接觸不同的演藝行業。Mag希望未來多花時間在音樂上，也希望盡快開一次演唱會。
林欣彤在台慶劇《老表，畢業喇！》中演程舒，跟前輩蔣志光和韋綺姍合演一家人。林欣彤入行多年甚少拍劇，今次演一個教育系的學生，有點像做回自己。Mag回想自己的唱歌路，因小學六年級在唱歌考試中遇到首位伯樂，音樂老師讚她有天分，因此她決定認真聽歌練習模仿，所以覺得老師對自己影響很大。
「我由小到大喜歡唱歌，卻從來沒有跟老師學唱歌。只是因小學六年級在唱歌考試中遇到首位伯樂，音樂老師讚我有天分，因此我立定決心認真聽前輩的歌來練習模仿。所以我覺得老師在我心中很重要，改變我的一生。今次劇中我演的『程舒』係一個補習老師，本身對教育好有抱負，好想成為別人的榜樣，所以好想做一個正規老師去教育下一代，唔想淨係為咗搵錢去教人。今次我同好好的演員班底合作，蔣志光老師同韋綺姍前輩演我的父母。大家都是唱家班，都是一個家庭family來，我們戲裡戲外都成日合唱。好幸運可以同蔣老師合作，之前我們又一起演音樂劇。蔣老師本身係一個好好的演員及前輩。因此我很少拍電視經驗，佢唔介意亦都會主動咁教導我，始終演戲唔係就咁演出來，好多部機要就位，或者對手的企位，好多嘢要顧，蔣老師都會主動教我，呢度要點點點，嗰度又要點點點，總之佢覺得我做得唔夠就會教。」
好多時想被了解
年頭和王祖藍的公司簽約，為林欣彤設計了一系列的發展方向。唯近日有消息指，其首個個人演唱會「難產」，所以Mag感到不開心，而且有感歌唱事業停滯不前，萌離巢之意。對於以上傳聞，Mag表示是因時間倉卒，所以決定延期開騷，唔關祖藍事。
「我今年工作都好充實，年頭拍劇，之後5月開始連續三個月都要排練舞台劇，之後兩個月正式做舞台劇演出。舞台劇雖然第一場演出時有些小問題發生，只能演出一半，但見到一大班人好齊心地去解決一件事，好興奮。本來之前有同公司傾過想年尾開騷，但覺得不如唔好咁倉卒為咗要開騷而開，我希望可以有一個好的時間去排練，希望演唱會可以盡善盡美，所以就決定唔開住。祖藍喺音樂上得到好大自由度，他本身也是藝人，更容易了解我想法。我唔係好叻表達自己，但好多時想被了解。當初合作的原因是好想有一個老闆，咁啱我同舊公司完約，祖藍佢又有意開工作室，樂小姐（樂易玲）就問我有冇興趣同祖藍傾吓偈呀？祖藍會親自出來同你傾。了解每個藝人的需要，傾吓傾吓就加入咗吨u作室啦！」