■同門師妹陳凱彤為泳兒唱生日歌。香港文匯報訊 泳兒（Vincy）昨日生日，早前唱片公司同事就搞咗個驚喜生日會，由於之前的surprise party都被Vincy識穿，所以今年她的助手特別緊張，早三個禮拜已經準備。
上周五，Vincy到張敬軒錄音室為第四隻Hi-Fi碟錄音，錄音期間，忍唔住笑的軒仔在外面panel話：「真係冇得挑剔㗎喎。佢唱得一take比一take好喎。」不過為咗玩爆Vincy，軒仔刻意挑剔她甩beat，之後仲影帝上身嬲爆咁走出錄音室。
企咗喺度呆咗的Vincy一臉茫然，事後她說：「好驚，未見過張敬軒咁惡。之前同佢錄另一隻歌佢都會讚我，今次好似令到佢好失望。軒仔的戲真係實在太好啦，明明我自己有數緊beat，但係佢令到我都開始唔相信我自己。」
Vincy仲話軒仔出咗去的時候有諗住追出去，「諗住同佢say sorry，但我都嚇到有啲呆呆哋，都唔知點做。我有一刻懷疑自己係咪發緊夢，我喺度諗：『點解全世界都喺度鬧我？』哈哈。」後來同門師妹陳凱彤捧住生日蛋糕，跟一眾同事衝入錄音室大唱生日歌，嚇到Vincy黐咗埋牆，最後搞到Vincy又喊又笑。問到生日正日點慶祝，Vincy就話：「正日男朋友請我去旅行。」