第二場、第四班、一○○○米。「和平開心」至今取得一贏十一位，係一匹易位難贏分子，不過七歲馬接近兩年未再贏，方嘉柏仍然保留至今，可見對其前景仍然抱有希望，事實上，此駒今季能夠四戰兩上名，狀態保持得穩定之餘，兩場亞軍分別負於「同得福」及「鑽得勁」兩匹質新好馬。「和平開心」此類久無建樹的老馬，既然目前有迴光勇態，當然要好好把握，相信幕後大有機會部署用盡一時，今仗捲土重來，同場再無惡馬在陣，形勢已見不俗，加上「和平開心」相隔兩周又再上陣，密密跑更反映決心搾盡再算，值得高度重視。
第七場、第三班、一二○○米。「心慷慨」上季曾經兩度於三班賽上名，其後減分成功，今季首戰降至四班上陣，閘前更落飛至不足兩倍，雖然最後僅贏半馬位，但其實鞍上人潘頓只係睇住來食，贏馬姿態其實並不辛苦，勝後今仗回升三班，既然上季此駒有本事在此班一再上名，現時大熟大勇，能力比當時更上一層樓，負輕磅作賽下，實力非一般三班對手可比，熱身後狀態有進冇退，今次難得同晚有兩組同班同程賽事，實力馬被分散，賽事水準下滑，此駒可乘勇態爭取連捷。