■鮑姐表示未見過展鵬現任的女友單文柔。香港文匯報訊（記者 梁靜儀）鮑起靜(鮑姐)、陳展鵬、胡定欣、姚子羚、陳山聰及江美儀等，前晚到尖沙咀出席劇集《同盟》飯局，當鮑姐現身時全場歡呼，原來當晚由鮑姐埋單請客。鮑姐表示劇集播出時因要拍戲而未能幫手宣傳，感到好抱歉，加上該劇最近在《星和無綫電視大獎2017》中有成績好，所以由她請客。
鮑姐與展鵬一起接受訪問，鮑姐表示之前去了台灣拍了兩個多月電影，再去了冰島六日幫孫燕姿拍MV，因好難得會去冰島，所以就答應了，可惜睇唔到北極光。清減了的鮑姐笑說：「唔入TVB唔知要減肥，拍《同盟》時因肥冇一件衫着到，連服裝部姐姐都話TVB的人真係好瘦，比起初入來拍劇時都瘦了七、八磅。」
想早日飲「新抱」茶
問到《同》劇會否開拍續集？展鵬笑謂要睇「阿姐」(鮑姐)及監製，鮑姐就表示想見好就收，但如果原班人馬就想拍輕鬆一些的劇情，問到可會叫展鵬帶埋女友一齊拍？鮑姐聞言嚇了一跳說：「佢好多女友，可以全部都來拍。」展鵬即強調：「好多緋聞來的。」再問到鮑姐可有見過展鵬現任的女友單文柔？她就表示未見過。展鵬就表示有機會都會帶給「阿姐」見面。問到展鵬何時公開拍拖呢？戀情已是半公開的他說：「低調些，一陣在手機畀阿媽睇。」鮑姐笑指展鵬會有分寸。鮑姐又笑稱都想早日飲「新抱」茶，愈快愈好。鮑姐又表示稍後要忙湊孫，十二月會陪孫仔回英國倫敦，順道去旅行。
定欣前晚見到鮑姐即上前來個擁抱，她與子羚表示好開心鮑姐請食飯，因為大家都約了一段時間，所以鮑姐一拍完電影即約食飯。她表示很想再與鮑姐合作，下次要演對方的女兒，因鮑姐很有媽咪的感覺，很想被她痛錫。問到之後還會否再約食飯？定欣表示就要視乎馬來西亞及台慶會否有好成績。
杏兒聽生日歌眼濕濕
提到之前「胡說八道會」為胡杏兒慶祝生日，子羚笑說：「係佢老公提議，因為杏兒正坐月唔可以周圍走，而杏兒平時着得最多就係睡衣，話佢好悶，叫我們不如搞個睡衣派對。」定欣透露當晚杏兒老公偷偷將她運入屋入面，杏兒一行出廳大家就唱生日歌畀佢聽，佢好開心，眼濕濕，杏兒今次係第一個用媽媽身份過的生日，坐佢完月就約佢一齊出街食飯。子羚又透露下次慶祝應該輪到豹嫂(胡蓓蔚) 生日，然後就到她，都想一起慶祝，問到不是輪到她結婚嗎？子羚笑說：「搞咗生日先，生日近些，同埋生日日子就一早定咗。」定欣就指豹嫂叫她們不用送驚喜了，因為她們經常將驚喜破壞：「我試過Send錯群組穿咗煲，所以之後Send Message都好緊張要好小心。」