上次日馬沈集成有隻「威信」，臨場由五十五蚊跌到落三十六蚊綠燈開跑，呢注飛相信唔係普羅馬迷落，事關大眾將注意力都集中喺雷神隻十五蚊獨贏馬「彪型猛漢」身上，「威信」閘前呢注大戶落飛，將「彪形猛漢」由十五蚊打番上十八蚊，大家都知道，雷神馬越熱越穩陣，呢下多分三蚊，未跑唔少馬迷都知凶多吉少，不過知道輸都冇用，正當以為燈神隻「威信」有計之際，點知有隻「金太陽」黃雀在後，巴度呢隻「威信」輸到班大戶眼都凸，正當沈廄班幕後對巴度信心動搖之際，好彩夜賽拿拿臨贏出「小米周」，殺敗雷神大熱門隻「龍船」，今次WQ齊補中，總算挽回馬房對佢嘅信心。
大家可以睇睇今次日賽，沈廄出十駒，有半數由巴度騎，擺明沈集成仲好關照呢位法國籍騎師，其中兩場級際賽，沈集成將短途隻「永旺年年」交巴度披甲，另外場馬會一哩錦標，沈集成仲雙龍出海，雷神騎「四季旺」，巴度就騎隻「縱橫大地」。呢類二級賽錦標經常是爆冷溫床，「永旺年年」上季尾贏千二米沙田銀瓶，當時蹄下敗將是蔡約翰嘅「翩翩」及「澳斯卡」，證明本身有贏級際賽實力，季初被安排赴韓國跑泥地賽，只係陪「縱橫大地」過去，並非馬房主力出擊對象。韓國作伴「縱橫大地」任務完成，「永旺年年」十月七日重新於機坪出現，一直備戰至今，上周五交巴度過檔彈課千二米泥地大閘，全程守馬群中間位置，目的輕舒步頭，可能巴度有運，馬匹抽個二檔起步，檔位仲靚過上季由麥偉利爆冷所排八檔，相信巴度睇過隻馬點樣喺呢位南非籍騎師胯下爆冷，呢仗必定依樣劃葫蘆。至於同場兩隻擂台躉，「紅衣神醒」同「幸運如意」目標肯定會放喺下月的國際賽，點都好今戰會俾「永旺年年」一個偷雞嘅機會。