踏入年尾，澳洲馬圈上演唔少重頭戲，上周舉行嘅春季嘉年華壓軸重頭戲，途程二千米一級賽阿聯酋錦標，當中有不少惡馬在陣，包括一級賽葉森讓賽盟主「高興崇拜」同埋喺潘頓胯下贏過唐加士打一哩賽「有點兒」，不過，今屆阿聯酋錦標嘅主角就唔係呢兩匹一級賽盟主，因為「高興崇拜」及「有點兒」只能屈居第二、三名，反而移籍到澳洲發展嘅日本馬「東瀛明星」繼續發光發熱，繼前仗揚威一級賽杜勒讓賽後，今次再添多場一級賽勝利，喺連達文胯下殺低兩匹惡馬。既然「東瀛明星」咁成功，唔知遲啲會唔會越嚟越多日本馬轉往澳洲發展呢？
另一方面，澳洲馬后「雲絲仙子」完成覺士盾三連霸兼連贏廿二場後，各界對於呢匹目前評分最高草地賽駒嘅明年部署，自然非常關注，尤其係歐洲馬圈，事關練馬師華禮納早已透露有意讓呢匹馬后衝出澳洲。其實目前已有唔少方案提供俾華禮納，呢位星級練馬師初步有意讓「雲絲仙子」出戰喺英國紐百利馬場舉行嘅千六米直路一級賽樂景傑錦標，作為遠征歐洲首站，然後角逐皇家雅士谷賽期嘅女皇安妮錦標，若然真係成事，睇吓到時一眾歐洲惡馬能否抵擋得到呢匹澳洲馬后啦。
早前勝出首屆珠穆朗瑪峰錦標嘅「紅達時」，繼續以出色表現話俾大家知，佢先喺目前澳洲級數第一嘅短途快馬，事關上周六喺費明頓馬場上演嘅千二米直路一級賽達利經典賽，呢匹五歲馬再次展現飛快前速，以一放到底姿態贏出呢場一級賽，兼且取得六連捷的佳績，可謂銳不可當。至於由艾道拿策騎嘅「遠大前景」則後上不及跑第二名，早前試過閘前發脾氣退出嘅灰色神獸「尚多湖」，今次改由鄧迪執韁，雖然早段唔算落後太遠，但拉士亦唔算衝得太勁，只追番一席殿軍，表現略為令人失望。
回說香港馬匹表現，自從入秋之後，草地賽道似乎起了微妙變化，看看近幾期快活谷及沙田賽事，先後爆出「天皇巨星」、「大收成」及「金太陽」巨型冷門，三駒共通點都曾經在泥地報捷，而練馬師苗禮德事後亦指出，上周六場地偏硬，類似泥地狀況，因此「金太陽」才能在田草變身。其實，再看上期夜馬三甲賽果，「埼豐」曾於泥地入圍，「財高八斗」在泥閘有好走勢，「話得事」及「紅運發財」來港前曾贏膠沙地，似乎現階段的草地跑道像泥地更甚於草，未來又會繼續出現這個情況嗎？