香港冠軍騎師莫雷拉於上年八月廿八日喺日本客串，單日取得六場頭馬，風頭一時無兩。曾經貴為全球第一高手莫雅又點會失威，佢趁英國馬季歇冬，依家喺日本客串，上周日於東京競馬場有八匹坐騎，竟然取得六冠一季一殿，真係勁到冇朋友。至於騎師喺日本嘅單日頭馬紀錄，仲係日本國寶武豊及李慕華創造嘅一日八場頭馬，莫雅將於下周三國際騎師錦標賽來港獻技，加上國際賽策「高地之舞」爭香港瓶，屆時馬迷又可大開眼界。而上周日已經六勝一級賽嘅日本馬王「北部玄駒」，以王者姿態挑戰衛冕日本盃，點知喺冇人走自己走嘅絕好形勢下，竟然被澳洲好手布文操刀嘅「高尚駿逸」後上一舉擊破，最後馬王更連李慕華匹三歲馬日本打吡冠軍「金之霸」都衝唔過屈居第三，春古馬三冠落空，秋古馬三冠冇埋，跑埋十二月有馬紀念賽就退役嘅吽A仲連挑戰八勝一級賽紀錄機會都斷送，頓變三失認真可惜！不過「北部玄駒」再奪馬王可謂十拿九穩，事關「北部玄駒」今年已經贏咗大阪盃、春季同秋季天皇賞，合共三場一級賽，主要對手「金之霸」日本盃未能奪冠，有馬紀念賽亦好大可能缺席，「里見皇冠」輸咗秋季天皇賞，日本盃更加跑到冇影，咁嘅賽績連「北部玄駒」車尾燈都見唔到！其實過往可以連續兩年獲選馬王，自JRA賞一九八七年設立以來都係得「吉兆」、「大震撼」同「伏特加」三匹名駒做到，「北部玄駒」雖然冇得獨享史上最勁，但可以追平佢哋都係一大成就啦。
講完日本馬將鏡頭一轉，曾由告東尼訓練，於二○一五至一六年國際二級賽馬會一哩錦標盟主「美麗之星」，今年一月在董事盃大敗後在香港退役。不過，此駒競賽生涯並未結束，目前在澳洲準備復出，並報名角逐今周六在布里斯班東奔馬場舉行的千二米三級賽佐治摩亞錦標，且看可否取得好成績。