上周日馬主劉錫康名下新貴「旺蝦王」，服役至今場場贏馬、場場都成功製造話題，回帶睇番第二次上陣嗰場，就拋甩對手五個幾馬位，真係好誇張，去到上周日「旺蝦王」爭取第四場頭馬，今場又有神乎其技喇，睇吓妎]完四百米段柱，已經見鞍上騎師潘頓回頭望，求其推兩嘢費事再快，結果又再一次以晨操踱步式姿態，締造四戰四勝不敗佳績，今場贏馬咁易，真係同一代馬王十七連勝嘅「精英大師」好似，當年呢匹告東尼馬房名駒，陣上一樣多次按住返嚟贏馬，呢啲咪霸氣囉！依家香港星級佳駟唔算多，有呢匹新灰獸掀起話題，多啲人睇馬梗係好事喇！「旺蝦王」有冇「精英大師」咁勁，就要時間證明，但星味呢家嘢，「旺蝦王」肯定越來越濃喇，馬主昔日曾養嘅「靚蝦王」及「正蝦王」都贏過唔少大賽錦標，估計呢匹新貴「旺蝦王」，絕對有機會接棒，贏馬凱旋名利雙成。
另一方面，在剛過去的星期六、日，蔡明紹代表香港參加由毛里裘斯賽馬會主辦的國際騎師錦標賽事系列，首日賽事他雖然未有頭馬進帳，但卻取得一亞兩季，成績不算太差。到了次日賽事，蔡明紹早段場次手風平平，頭四匹坐騎悉數三甲不入，然而直至尾場千六米賽事，憑入直路走內欄慳位的Imperial Dancer建奇功，終於在毛里裘斯贏馬，賽後蔡明紹更非常興奮，不斷揮動香港區旗，為港爭光。不過，由於蔡明紹只得1W，他在今次國際騎師賽事系列只累積十九分排第五，曾來港的南非老將霍達則於次日賽事大演帽子戲法，以四十一分擊敗紀仁安、布達德、巴米高及勞愛德等好手，於毛里裘斯騎師賽封王。