第六場､第三班､一○○○米。「靚跑得」四歲仔來港後只跑過四次皆不上名，惟計血統必是中短途馬，看上仗除眼罩出爭谷草一千，全程留後競跑，最後只負頭馬「運來寶寶」三馬位而已；今晚大告再報一千米出征，食住馬房上周六贏出「包勝」嘅旺勢，屆時扒冷門不妨動動腦筋。
第七場､第三班､一六五○米。「大英雄」剛戰窄場一哩國際騎師賽場合，由潘頓發揮得出色，將對手一網成擒；勝後以慢踱為主，上周就再安排試千二泥閘，工夫仍見嚴謹，沈集成搏馬明刀明槍，無意收藏，今次用到巴度又抽埋一檔起步，千二磅粗身大馬只孭輕磅，連捷機會當未可看輕。
第八場､第二班､一六五○米。「小米周」六歲仔上季轉投沈廄遇到低潮，上季尾更跑過兩場十名以外足可反映；惟今季經過練者悉心打理下，最近三戰出爭谷草一哩及千八共得一冠一亞，最重要馬匹學懂留力識得追馬，而今仗復爭一哩配潘頓執韁，只要遇到有利後上步速，有力食尾胡。