布達德為兩屆法國冠軍騎師，目前僅是二十五歲之齡，可見英雄出少年，他於二○○九年四月首次獲勝，一四年憑「佳朗」攻下巴黎大賽，初嚐一級賽勝果，其後夥拍「重大機密」先後揚威三項一級賽，分別是羅斯齊爾德大賽及翌年的傑克莫華大賽和太陽戰車錦標。布達德曾於一四年底在日本策騎兩個月，主要為練馬師池江泰壽效力。他從騎至今已取得超過一千二百場頭馬，最近憑「巴甜兒」攻下紅寶錦標，再添一級賽頭馬進帳，此子上年喺法國贏咗三百場頭馬，力壓蘇銘倫成為冠軍騎師，實力自然有番咁上下。
呢位法國冠軍早前來港參加國際騎師錦標賽有頭馬進帳，策騎蔡約翰馬房的「紅運發財」勝出其中一關賽事，可見身手確實有番咁上下，嚟緊下周一（二○一八年元旦日一月一日）亦都會開始為期兩個月嘅客串期，縱使報稱嘅最低造磅為一二三磅，要喺香港搵坐騎會比較棘手，不過有料自然多人撐，布達德暫定喺好運一月一賽馬日將會有數匹坐騎，喺焦點賽事千四米三級賽華商會挑戰盃，更加會策騎東廄嘅「大印銀紙」（圖8號）出賽。心水清嘅馬迷應該會留意到，「大印銀紙」元旦日會負一二二磅上陣，比布達德報稱嘅最低造磅仲要輕。據悉呢位法國好手為咗可以跑呢場國際三級賽，今個星期將會積極減磅，見佢咁神心，分分鐘第一日上陣就可以捧走三級賽！除咗「大印銀紙」之外，當日布達德仲會策騎告東尼匹「帝豪寶寶」、賀賢馬房嘅「馬到成功」同埋沈集成馬房嘅「飛越峰」。且看到時呢位前法國冠軍係咪真係可以同騎師賽嗰陣一樣，初次上陣就有馬贏，一鳴驚人啦！
海外馬圈消息方面，澳洲賽馬近年獎金越來越高，在二○一九年，又多一項獎金豐厚的系列賽事誕生，為抗衡神奇百萬拍賣會的兩歲馬大賽，般利殊拍賣會新一年二月份將在和域園馬場首辦一項名為Inglis Millennium賽事，專為在殷利殊拍賣會出售的兩歲馬而設，獎金為二百萬澳元（大約一千二百萬港元），與神奇百萬兩歲馬經典賽睇齊，並高過另一項兩歲大賽一百五十萬澳元獎金的藍鑽石錦標，故相當之具吸引力。另外，殷利殊亦將在二月份首辦Inglis Sprint，獎金達一百萬澳元（約六百萬港元），限在殷利殊拍賣會競投的三歲馬參與，而所有殷利殊拍賣會系列賽事，總獎金達到五百萬澳元，再附加三百萬澳元額外獎金予勝出三關大賽的馬匹，總獎金數達到八百萬澳元（約四千八百萬港元），可見非常吸引呢。