羅富全雖然俾蔡神仙過咗頭，但兩者目前只是兩場之差，呢位新紮練馬師現被馬迷稱為羅神，同師父齊名，剛周日以「紅衣優駿」取勝，呢隻馬現時四歲，贏呢場千六米時評七十四分，贏完後評分去到八十二分，仲差一場頭馬就可穩得打吡入場券，不過，馬房已計劃好目標，就係安排呢隻馬跑月尾場經典一哩賽，亦即係四歲馬系列頭關，當然贏到呢場馬，打吡資格就可以確定，如果入三甲嘅話，評分上再作調整，一樣有機會跑今屆打吡。
羅富全部署馬匹手法好正面，一些有過表現嘅馬，再出好少跑到冇影，好似隻「肇慶威威」咁，季內越跑越近，剛周日喺莫雷拉胯下殺入亞軍，亦係呢隻馬今季成績最好一仗，大家有冇發覺，雷神近幾場騎呢隻馬都係用一個留前鬥後戰術，以往呢隻馬是用均速戰術出擊，不過只贏過一場，之後就冇乜進步，雷神咁好心機教導呢隻馬，日後相信有機會成為羅富全另一匹反彈馬，起碼有兩至三場贏。
講番今次夜賽，羅富全今季接收嘅「威風霸皇」（圖7號），過往養喺蔡插A基本上羅富全好熟悉呢隻馬，情況似「鑽之友」，但「威風霸皇」今季跑過四仗，除一場泥地千二米輸七個多馬位較遠之外，其餘三仗谷戰短途一千米，均輸三個馬位之內，反映隻馬逐漸恢復戰鬥力，由於之前四戰由柏寶跑都唔係咁理想，最近一仗經已由李寶利接手，就係上場跑谷草一千米得第六名，輸唔夠一個馬位俾頭馬「運來寶寶」。復課隻馬保持積極打磨工夫，上周二馬房安排呢隻馬試泥地大閘，入到直路好似自動波咁一支箭標上前贏呢組大閘，回復番以前贏馬時氣勢，今次李寶利一早嘜定呢隻馬再騎，倉主亦樂於俾個順水人情，等佢可以有機會同呢隻馬建功，所以今次出戰谷草一千米嘅「威風霸皇」，值得再追多鋪。