巴度由十一月開始客串至今已贏咗七場頭馬，最近一仗就係幫高伯新爆隻「閃耀駿駒」，呢位仁兄甚受高伯新重用，對上一次日馬，又用佢爆隻「勇霸神駒」，呢位好手加埋早前獲沈集成及羅富全重用，未來日子仍大有可為。早前沈集成搵佢贏隻「小米周」及「威信」，羅富全用佢爆過「大眾精英」及「紅褲精神」。今次夜賽高伯新馬房一早搵定佢騎「無限欣賞」，呢隻馬與同晚「運來寶寶」及「勤德兼備」係同一家族馬，呢隻「無限欣賞」上季由告東尼馬房轉投高廄後，贏過一場濕泥地一哩，今季呢隻馬跑過一場泥地一哩後，馬房立即轉軚同隻馬轉跑谷草，兩戰谷草千二米分別得第三及第四名後，近兩仗增程跑一哩，亦係取得第三及第四名嘅成績。馬房安排隻馬集中喺谷草一哩發展，似乎好有信心隻馬喺呢個路程會闖出新天地，因為近兩仗跑一哩，末段都衝得似模似樣，前仗檔曳，郭能早段索性留守較後位置，待入直路才衝，雖然最後只衝得第四名，但距頭馬「埼豐」及「劍聶風」頭二馬不足一個身位。最近一仗，又跑一哩，乃國際騎師錦標賽關係，抽到莫雅騎，本來係機會馬，因為排番個三檔起步，所以鞍上人順勢佔中間位置，點知鬥衝唔夠「大英雄」及「一支梅」衝，僅得第三名。馬房深信，呢隻馬會好適合巴度跑，事關呢位騎師擅將尺寸馬留住衝一段，「無限欣賞」交由佢壓陣人馬一定合拍，所以屆時呢隻六歲馬值得大家重視。