「安友」與「安喜」呢一對父女馬，同晚被安排跑泥地賽，因為兩隻都係四班馬關係，雖然來自唔同馬房，但佢哋好似夾埋咁，一對父女馬分途報名，老竇隻「安喜」跑第五場四班一哩，囡囡隻「安友」就跑第三場泥地千二米。先講羅富全隻「安友」，馬房今季泥地成績唔錯，到目前為止三十二場頭馬，其中八場來自泥地，即係頭馬四分一，所以由羅神接收嘅泥地戰馬都有番咁上下成績，但「安友」今季未有成績交出。呢隻馬上季隸屬蔡約翰馬房，得冠亞季各一，獲冠亞兩場路程屬泥地一哩，得季軍是在田草千六米。麥菲文隻「安喜」，今季先後於千二米田草取勝，千四米及泥地千二米上名，泥地一哩最近至跑過，得一席第五名。基本上大家可睇到「安友」及「安喜」邊隻跑泥地一哩最好，咁梗係「安友」跑泥地一哩有把握啲，起碼有贏馬賽績支持，不過，馬房唔安排牠跑一哩，顯然係避咗「安喜」。大家再睇睇，羅富全替「安友」報名時候乜都冇用，反而麥菲文隻「安喜」就用咗張王牌報名，馬房誠意十足，亦希望盡量替隻馬爭取好成績。「安友」與「安喜」雖然唔同馬房，但出自同一路人馬，「安友」肯讓路，顯見「安喜」必有計，再睇上次騎開「安喜」嘅莫雷拉，呢次依然卜定騎呢隻馬出賽，而麥菲文剛周日賽事贏隻「鴻圖飛星」，呢隻「安喜」仄到準一準再來，唔跑短途刻意再攻中距離，是有機會食住個勢爭取季內第二勝。