今晚要留意葉楚航一對馬，呢對就係「赤水神駒」及「軍炮」（圖1號），周一上午「赤水神駒」何志文與「軍炮」楊明綸齊齊於地堂走花蹄俾倉主葉楚航睇，倉主伏於欄邊，睇咗好耐，最後兩駒踱畢，倉主才上前細心檢查各駒四蹄及馬身，冇問題才讓工作人員清潔。「軍炮」於楊明綸胯下走花蹄後，即與倉主密斟，騎練兩者更雙雙走入馬房寫字樓，據一些馬房手足透露，原來倉主經已準備好近兩場「軍炮」於韋達胯下的陣上片段，由於今次此駒負輕磅關係，韋達未能造磅，最後才益了楊明綸，換上楊明綸只負輕磅，今次馬房亦刻意替這駒增程跑千八米，而匹馬係第一次跑呢個路程，倉主在留放方面要與楊明綸作更深入分析，所以要賽前睇片咁緊張，當然「軍炮」肯增程列陣，倉主都信任牠有韌力應付，畢竟同晚三班夜賽，亦有一哩可以給「軍炮」上陣，半冷要留神。另外跑第一場隻「赤水神駒」，今季由潘頓贏過，今次落班即搵贏馬組合列陣，千祈唔好錯過捧場機會。
雲信凡高外觀吸引
上周四可以話沈集成最黑仔一日，佢照平常咁督操，當馬匹操練完畢，有時跟埋入馬房仄馬，偏偏跟住隻「理想回報」時，突然俾隻馬無情情一撞，成個人彈飛九丈遠，仲撞埋棵楊柳樹度，撞到樹都歪埋，呢吓當然更傷，事後知道佢傷咗幾條肋骨，當大家以為沈集成呢劑好大鑊之際，點知佢相隔兩日即入場，左邊臉貼住塊膠布，好似若無其事咁，當日佢仲有頭馬贏添，就係由潘頓所贏「按得澄」。不過，事後沈集成接受訪問，並唔係好似表面大家睇咁，貼塊膠布就冇事，本身真係傷咗幾條肋骨，入場全靠食止痛藥，馬房上手都稱佢係鐵人，現時督操馬匹，雖然多數交由副練及一班馬房手足代勞，但從來冇放緩過準備戰馬操練，好似今次夜賽咁，一早吩咐副練要小心打理「滿載而來」同「雲信凡高」。呢兩隻馬周一早課返馬房後，副練再安排親自踱「滿載而來」，「雲信凡高」則由巫顯東踱，兩隻馬喺地堂內拍踱十餘分鐘，下午過磅後再安排於地堂內教閘，備戰動態非常積極。如果唔講「雲信凡高」流過鼻血，相信好多人都唔會知，因為呢隻馬埋門馬身養到脹卜卜，火氣旺盛之餘，毛色仲好似打咗層蠟咁，呢隻馬季內跑過兩場泥地千二米，兩場都得第二名，最近呢場因為流鼻血才要硬性休息三個月，待養回健康才上陣，馬房希望可以養好健康後便一擊即中，今次用埋個見習生巫顯東減磅列陣，擺明車馬一定鍊硬。
滿載而來情緒穩定
「滿載而來」上場首次跑泥地一哩，即刻有個第二名成績交出，只係輸俾低班泥地王「鑽之友」腳下，事後馬房除知道呢隻馬跑泥地性能好之外，仲有一樣嘢幫到呢隻馬，就係跑泥地可以令呢隻馬情緒穩定啲，原來隻馬陣上表現時好時劣，就係因為情緒問題有關，轉戰泥地，跑道遠離群眾，對穩定情緒更有幫助，今次馬房專登再報戰泥地一哩，就係睇準呢個場地環境最合隻馬發揮，用番潘頓人馬有過溝通，屆時自然可以跑出水準爭勝，可以繼續捧場。