■去年絕對是衛詩雅上位的好時辰。衛詩雅（Michelle）用了十年時間在演藝圈終於捱出頭，去年參演多齣電影，在《失眠》中更有突破的大膽演出。今年賀歲檔，夥拍影后劉嘉玲、影帝任達華演出，戲中詩雅同華哥演情侶。單身多時，問到詩雅會否像在片中找一個年齡比自己大的男友，她表示年紀大的男生反而有安全感，可教曉自己更多。■採、攝：植毅儀／Makeup：Cyrus Lee、Hair：SingTam(pi4.com.hk)／場地：英皇駿景酒店
去年絕對是衛詩雅上位的好時辰，一共有6部其參與的電影上映，由年頭排到年尾，只要你走進電影院，總會有一部電影是她有份參演的。今年賀歲片，她更升呢跟劉嘉玲、任達華演《我的情敵女婿》。
「從小到大很喜歡嘉玲姐，一直希望與對方合作，今次終於如願。嘉玲姐是大美人，所以好榮幸，其實初初開工有啲驚，因為佢實在太有氣勢，但接觸過後覺得佢係好細心嘅前輩，好有媽媽feel，會拖住手叫阿女咁，好sweet，唔會驚。然後華哥好識??人，成日在片場幫你影相，同佢哋合作好開心。華哥係一個好歡樂的人，一望佢對眼就畀佢吸引住。」
任達華與衛詩雅年齡相差30載，談到戲中與年紀大一截的華哥相戀，Michelle表示現實生活中從未想過，但也不介意男友大過自己，只因男方如果大過自己，會教到自己很多。
「我拍拖一定沒時間理我男朋友，分咗手兩年，未有適合的人。現實中雖然未試過相差有咁多年的，但我唔介意男友大過我，反而大過我的會教到我，保護性強，屋企人都唔會太反對，都係睇對方人品！但呢兩年事業有起色，自己想專注事業，同埋現在同返父母一齊住，好享受被他們照顧。咁多年來，多謝家人無條件的支持，唔介意自己的收入。有時諗自己30多歲，連家用都唔夠畀，仍要父母擔心，自覺無用。同前男友分手後，搬回家同父母住，爸爸一手一腳幫自己搭建了一個衣帽間，嗰份窩心，外面真係搵唔到。」
感激邱禮濤李敏賞識
做演員以前，衛詩雅曾做救生員，之後又考取證書做鑽飾鑑證，月入最少4萬至5萬，後來做演員，收入不穩定，更試過連續3個月零收入。幸好去年迎來事業收成期，有電影《失眠》、《喵星人》、《原諒他77次》上映，當中《失眠》的演出，獲不少讚賞，有望在金像獎獲提名。問到詩雅如果要多謝3個在她演藝路指引的人是誰，她表示分別是邱禮濤導演，編劇李敏及現在的經理人Kar。
「其實你的問題好為難我，入行十年，好多人都教識我好多事，點只多謝3個人咁少？如果真係要講，邱禮濤導演，編劇李敏，及現在經理人Kar。大家都知我以往演喊戲為主，是邱禮濤導演及李敏好大膽找我演《失眠》，發掘出我另一面，這一面是我平時自己都未見過的。我不是一個有很多花邊新聞的演員，我入行近十年，這套電影的宣傳是我滿足最多，我真的很重視。另外，現在的經理人真係好用心去幫我，佢會幫我分析接邊套戲比較好。」