第七場､第三班､一八○○米。「海利多」沈集成馬房長途健將，季內六戰，初出角逐谷草千八，喺羅理雅胯下後上險勝，打後五戰再喺谷草千八再跑亞席，鞍上人又係羅理雅，人馬合拍非常。再看最近三戰皆未能躋身三甲，至於今仗小休月餘再戰此強項，排有利三檔起步，兼夾配炒飯哥操刀，有力再起風雲。
第八場､第三班､一二○○米。「運來寶寶」容廄短途快馬，在港跑過十九仗，先後取得三冠三亞兩季，再看上年十二月初配梁家俊，喺窄場一千爆出四十六倍大冷W；拚後再跑兩仗走勢點到即止，埋門復課所見單試力度十足，步勁火旺，今仗改配皓楠仔競逐窄場千二，冷門此中尋。
第九場､第三班､一六五○米。「與龍共舞」今季出賽三次跑獲一季，目下評八十四分必有大把上升水位，而今晚渡江增程一哩，練者搵到雷神掛帥，配搭用到最強，今次遇上一組評八十五分頂的三班賽，只要遇到有利形勢，有力開糊。