今日大年初六谷草安排九場夜馬，以C欄C加三彎跑道進行，頭場提前至下午六時四十五分開跑，全晚重頭戲為一班千二米跑馬地錦標，另外今晚亦係跑馬地百萬挑戰盃壓軸戰。練馬師方面，蘇保羅及霍利時皆派出不少實力馬，可優先留意。騎師方面，潘頓、田泰安及潘明輝均值得重視。
第一場、第五班､一○○○米。「勁駿皇駒」何良八歲馬，雖然戰鬥力今非昔比，惟爛船仍有三斤釘，況且轉到今季搏馬順風順水嘅何插A無理由交不到好表現。看上周三配雷神出戰窄場千二，沿途慳位力拚第四，狀態顯見復勇；今回練者匆匆入紙揀一千再搏，老馬既跑應冇保留矣。
第二場、第一班、一六五○米。「勝得威」告東尼A布馬具備高質，上季總共取得四冠三亞兩殿佳績，惟今季賽過六戰，除首仗跑田草千四得第二之外，打後五戰皆徒勞無功；今次渡江角逐一哩，翻查上季喺潘頓胯下跑同程，放頭走按韁大勝；今回重遊勝途機會可秤高一線。
第三場、第四班、一二○○米。「喝采」遲熟分子上季轉投告達理馬房三戰皆北，而季內上陣五次，頭四場以第二回合出爭谷草千二，採取後追戰術得第四，走勢最為悅目；上仗練者再報此程卒現真身，十五倍大冷門後上一攻而破；復課所見打仔馬狀態有進冇退，今次再爭勝途，環看對手爾爾，交出水準可前列而回。
第四場、第四班、一○○○米。「阿凡達」徐雨石五歲馬，踏入今季八戰，第四回合喺谷草千二獲勝；打後四戰，除咗上仗泥地千二落敗之外，其餘三戰窄場短途俱跑季軍；官仔馬復課狀態仍在勇點，今回洗底再戰窄場一千，當有打翻身仗本錢。
及時行樂難尋對手
第五場、第四班、一六五○米。「及時行樂」李易達馬房四歲中距離賽駒，前仗初跑田草一哩，立刻以凌厲後勁把對手摧毀，那贏馬姿態實在太難忘，大可反映牠跑此程威力係極之高強；上賽加五磅於原班再戰贏馬路程，配綸仔後上只跑第四；拚後仍由此子用心調教，今仗渡江轉戰一哩，以其實力應難尋對手匹敵。
第六場、第一班、一二○○米。「駿明珍寶」（圖前駒）蔡約翰忠心鐵馬，季內密密跑過十仗，合共獲得三冠一亞成績，再看上仗轉程田草千二，就喺杜利萊胯下後發先至再爆十倍冷W，五歲馬準繩中持續見進步；拚後出試火氣仍旺，今次加至一百分復爭谷草千二，為爭跑馬地百萬挑戰盃必搏甩髀。
第七場、第三班、一八○○米。「安荃」今季轉投羅廄，先後五戰共取兩亞三季軍，表現四平八穩，惟尚欠一場頭馬交代，翻看前仗出戰谷草二千二，後上影相僅負頸位；上仗加羊毛面箍轉攻田草大長途都力拚第二；今戰抖足月餘縮爭千八亦合腳法，誠屬爭霸之材。
第八場、第三班、一二○○米。「天下為攻」上季四戰三勝頭馬，曾經擊敗過明星馬「五十五十」，後駒今季光芒畢露；「天下為攻」上賽是本季復出戰，進度未夠好之下，最後仍可恃質凌人大熱輕勝；今次轉戰窄場對手次一皮，添食應冇難度。
勇冠王窄場性能佳
第九場、第三班、一六五○米。「勇冠王」大前仗配雷神出爭三班此程，後上輕勝而回，贏來完全無視對手嘅存在，掟開亞軍「勇駒」四個身位，由此證明，此駒在谷草一哩極之把炮；今次又再配合馬房攻勢而來，部署必思進取，值得重視。