今晚香港有九場夜賽外，周四香港馬迷亦會睇到「經典帝國」於杜拜出戰泥地千六米，呢場屬95分至105分賽事，「經典帝國」如要出戰三月底場高多芬泥地千六米二級賽，就先要取得優異成績。據熟悉美丹賽道的行家透露，由於此條跑道利前領，狀況與香港相若，故台前幕後都睇好「經典帝國」，今次用港將梁家俊上陣，馬迷都好希望香港騎師能一再於海外揚威，事關到目前為止，對上一次港將所贏出之海外級際賽事，便是由黎海榮策騎「極奇妙」贏日本短途馬錦標，已是一○年十月份的事。至於最近的一場港馬所贏的海外賽，則是「積多福」喺一六年九月份贏韓國短途錦標，當然事隔這麼多年，總希望再有香港馬於海外國際賽事揚威。
由於「經典帝國」出戰杜拜，練馬師蘇偉賢近日經已飛赴杜拜替愛駒打點一切，香港戰馬準備事宜全部交由副練鍾占祺代勞，所以近日每有倉主打電話入倉聽取報告，並順便安排戰馬接着的備戰工夫，正如今次旗下有兩匹戰馬，倉主是特別緊張，經已遙控落柯打給副練如何安排賽前加課，這兩駒便是「與龍共舞」及「君子精神」。喺周一最後試跑朝，倉主遙控所落的操練柯打，便是「與龍共舞」只在內圈踱一匝，另外的「君子精神」則安排午間才作操練活動。原來「與龍共舞」與「君子精神」被安排午間齊到機坪拍踱，前者用外籍騎馬人，後者則用副練鍾占祺，兩駒於機坪踱步十餘分鐘，然後到獸醫房照鼻，稍後副練要將兩駒的報告匯報番俾倉主，據悉兩駒健康均一切正常。而另外一道消息得知，兩駒於一星期前經已打過BV雙補針催谷，賽前準備工夫十足，已有本錢拚勝。
「君子精神」今次跑回季內所贏過的谷草一千米，用回贏馬騎師郭能，配搭上面更是完整，至於近兩戰所跑的是谷草千二米，並非這駒最佳出路，所以敗績不能作準，今次應可重振雄風，贏回一仗。
與龍共舞曾贏千六
至於「與龍共舞」，來港前在紐西蘭贏過兩場千六米，今次增程跑中距離定可勝任有餘，雖然屬初跑谷戰，但練馬師對旗下馬匹能否應付谷戰是十分有心得。「與龍共舞」經過季內多場熱身，現時狀態已進入爭勝水準，大家咪以為隻馬初戰谷地就忽略佢，上述呢兩隻蘇偉賢戰馬不妨一捧。
一哥倉主親督教閘
蘇保羅今次隻「一哥」必定要留意，喺周四午間，倉主專登入倉睇呢隻馬加課情況，先安排匹馬到機坪踱步，由副練魯柏軒主持，踱畢返回馬房教閘，倉主也在場親自監督，非常認真，經過三番四次的考驗，直至倉主滿意為止，所以論近況呢匹實而不華馬算是不俗，一向服侍開呢隻馬嘅工作人員指出，「一哥」有個習慣，就係好少能夠打疊跑得好，通常一仗走近好，下仗多數會令人失望，最近一仗由梁家俊跑三級賽田草一千米只得第八名，表現一般，今次跑回一班賽，騎師亦由梁家俊換回潘頓，信任馬房工作人員對此駒嘅經驗之談，今次「一哥」可能又會有脫胎換骨演出。