■鄭泳舜寸姚松炎「六成投票甩底」片段被刪得一乾二淨。 短片截圖「滅聲」呢樣嘢呢，反對派就成日「受害者」上身，但原來佢哋都好叻滅人哋聲長自己威風㗎。好似選緊立法會九龍西補選嘅姚松炎（蟲炎），就喺facebook登咗兩段經過世界級剪接嘅論壇節錄出嚟，其中一段佢起勢攻擊民建聯鄭泳舜（Vincent）會俾地產商「操縱」，但就將對方嘅回應幾乎飛起晒，另一段就係Vincent踢爆佢喺立法會蛇王極少投票，佢同樣將對方對佢最致命嘅攻擊抹得一乾二淨。「不盡不實」、「報喜不報憂」呢啲反對派經常掛喺嘴邊用嚟批評人哋嘅說話，蟲炎今次受返晒，有網民仲寸佢剪走晒對方回應就當自己贏咗，點做議員喎，更加有人宣佈「戒炎令」正式生效！
喺前幾晚嘅電視台補選論壇，蟲炎摷返Vincent嘅屋企、社企副總幹事一職甚至係佢住址嚟講，聲言佢當選後會俾地產商等背後勢力「操縱」。
Vincent即時叫蟲炎唔應該戾橫折曲，並解釋話自己喺深水埗基層社區服務咗十幾年係人都知，工作亦都唔應該分「有錢」同「基層」，又強調每個人都要對自己行為負責，佢對自己絕對有信心，仲有就係蟲炎摷出嚟嘅嘢都唔係咩秘密，佢自己一向坦白。
不過，喺蟲炎段節錄入面，就將自己質疑Vincent嘅內容一字不漏咁回帶，但當Vincent講到「我喺深水埗基層社區服務咗十幾年係人都知」之後，就將Vincent跟住嘅內容同埋佢疊聲阻止Vincent回應，fast forward（快進）咗成十幾秒咁多，完全聽唔到兩個人講乜，一直去到佢質疑Vincent會俾人「操縱」為止。
當晚，Vincent踢爆咗蟲炎喺上年財政預算案百幾項修正案當中，一項都無表決，同埋喺立法會9個月期間，亦都無就超過六成嘅議案表決。蟲炎就「大條道理」話表決財案修正案期間，佢代表立法會去咗新加坡出席「世界組織會議」，但就無解釋到點解無就超過六成嘅議案表決、究竟去咗邊，仲燒埋Vincent喺區議會嗰疊。
同樣，蟲炎段節錄將Vincent質疑佢「表決六成甩底」嘅內容刪走，同埋強調佢喺表決財案修正案期間去咗新加坡開會，仲上載咗立法會文件諗住「以正視聽」，但份文件寫住嘅並唔係咩會議，而係「拉惹勒南國際關係研究院多邊主義研究中心與世界貿易組織舉辦的2017年國際貿易議會工作坊」，workshop啫。
剪到支離破碎再砌新故仔
嘩，將原本內容剪到支離破碎再砌成一個新故仔，蟲炎你都「得」囉，難怪俾網民爆粗鬧爆你啦。
「Law Lai Jean」話：「剪晒對方啲回答，就當自己贏×咗呀？！咁×弱智點做議員呀！」「Sam Ng」就批評蟲炎質疑得人哋又要剪晒人哋嘅回應，「真係垃圾！」
有網民就質疑蟲炎到底係去外國工作坊重要啲，定乖乖哋留喺香港表決政府撥款重要啲。「呂紘燊」就覺得：「如果講得一席都不能少，我明顯覺得投票重要過出面。」「甘楓」亦都話：「香港人靠你去審撥款喎，你走咗去上這個工作坊，咁點守護香港人啲錢？」
網民宣佈「戒炎令」展開
原來蟲炎唔止對Vincent滅聲，對異見網民都一視同仁。「MagMag Li」投訴：「姚蠢炎對唔啱聽嘅民意會向fb舉報為垃圾訊息，咁即係話姚蠢炎絕無資格代表香港巿民，不合他心意的事實就選擇拒絕接受，你憑乜代表香港人？」「Wong Si Si」更加「宣佈」：「戒炎令已展開，全城抗炎，抗拒蟲炎。」
■香港文匯報記者 陳庭佳