■關楚耀(右)香港文匯報訊 日前關楚耀(Kelvin)作客TVB娛樂新聞台節目《StarTalk》，接受主播許文軒(Edmond)專訪，大談推出新歌《飢餓遊戲》及入行多年感受。Kelvin說：「之前同朋友傾偈，他們會覺得我唔係歌手，係藝人，我呢三四年真係放咗好多時間演戲，音樂放低咗，歌手身份俾人遺忘咗，所以今年真係會放多啲時間喺音樂上。」他又說：「其實拍完劇集《特技人》後再錄音，我睇份歌詞好似睇到劇本咁，好快就投入到個故仔，所以錄音錄得好快，好順利。」
專訪中提到關楚耀近期愛上攝影，他說：「唔知係咪人大咗，覺得自己揸住相機會忘記自己，乜都影，而且影相要捕捉，過咗就冇，同自己做人嘅機會都一樣，機會走咗就冇，所以有機會入錄音室，就要好好珍惜。」
談及感情方面，Kelvin說：「自己三年前都試過有感情低潮期，其實有邊個人唔想穩定，所以我好妒忌陳柏宇，成日都晒恩愛，有幸福家庭，我連幸福兩個字都未接觸到。」他笑說：「可能我形象同埋啲新聞畀外界感覺好曳，其實我比較純真，唔係純情！冇基心，有嗰句講嗰句，我冇口花花，只係有時有啲女仔主動識我，都唔關我事。」