■霆鋒的菜式presentation獲讚。香港文匯報訊（記者 植植）由謝霆鋒與加拿大名廚David Rocco 比併廚藝的節目《名廚爭鋒》日前播出第三集，今次比賽就去到菲律賓首都馬尼拉。
比賽前一日，當然要周圍「辣更」，當地名廚就帶了霆鋒和David食當地地道食物，其中一樣就係「鴨仔蛋（Balut）」，由於鴨仔蛋是於鴨仔孵化過程中被烹調，所以霆鋒和David見到個樣都面有難色，但他們最後都豁出去大啖食。
到正式比賽，這一站蒙眼試食的是馬尼拉傳統菜式-Sinigang（酸湯），為了試清味道及材料，霆鋒實行手口並用。由於今次只有兩個小時去買餸和煮，所以試食完後，霆鋒就一馬當先跑去街市買餸。買餸過程順利，霆鋒首先返到比賽廚房，他以麵條、蔬菜天婦羅、西瓜等來「重塑」Sinigang；而David就以「嫲嫲的味道」去烹調。
比賽根據菜式的賣相、味道、原汁原味和創意這四項來評分，三位評判首先點評霆鋒的菜式，他們很欣賞霆鋒的presentation（表現），「用麵條、西瓜同天婦羅，我真係好鍾意你用自己方式去展現呢道菜，好自我。由口感、技術層面嚟講，都係一流，就好似睇住一位畫家喺畫布上畫畫。不過呢場比賽係關於菲律賓嘅精髓，以Sinigang為題材，你好似有啲唔太貼題。」至於David的菜，3位評判就話：「整款菜式嘅美觀唔及Chef Nic，作為一個菲律賓人，我哋唔會將椰奶放喺Sinigang，我想像唔到將椰奶同海鮮、白酒同Sinigang擺一齊，但你將佢哋配合得好好，你所做嘅打破我哋每一個規則。」最後，David以24：22勝出。雖然霆鋒今集落敗，但因為前兩站都是霆鋒勝出，所以總成績68：68打成平手。
霆鋒獲評判鼓勵開餐廳
今集被追成平手，霆鋒話：「其實去每一個地方之前我都有search吓當地出名嘅食材、出名係咩dish，然後喺我自己心目中可能已經創一道菜盡量包含晒所有出名嘅幾食材喺入面，呢啲係我自己fusion方法，分解再重組。而David佢由細已經跟阿嫲入廚房，意大利嘅家庭好興一家大細，由阿嫲、阿爸、阿仔到啲孫，一齊入廚房煮一餐飯，呢啲就係佢嘅經驗。」
節目播完後，霆鋒就喺自己facebook 上載片段，他說：「第三集雖然輸咗，但我想多謝返當日其中一個評判Chef Bruce Lim。當日煮完後畀分前，佢畀咗本書我，好開心，佢寫『請你開間餐廳，你開嘅時候，我會排住隊。』好多謝前輩嘅支持，我唔知會唔會開餐廳，但係我會繼續煮落去。」比賽下一站將到馬來西亞怡保，還看誰勝誰負？