「勇敢傳說」上場加盟東廄首戰，由蔡明紹操刀跑第三，熱身後今次再來料可贏馬省招牌。「勇敢傳說」產自新西蘭，不過牠是售於南島一個較小型的拍賣會，父系「選擇」而母系為日籍新加坡賽駒Uno Sayuri，由於其母當年贏至二千二百米，加上「勇敢傳說」在紐已贏千四米，在港今季初競逐千二米，蔡明紹走位一絕咁靚爆冷之後，容天鵬替牠加程至千四及一哩亦是合理部署，但落場表現有追勢卻欠勁，不過落敗距離每次都算近。上場轉倉後重新打磨，埋門兩課大閘一泥一谷草按住順走，結果該場頭五名「上海大師」、「喜進」、「勇敢傳說」、「翡翠劇院」同「好快樂」入面，只係得「勇敢傳說」一隻，跑到第二段仍處尾二位置，並且尾八百米造全場最快四十五秒三七，仲要沿內欄左穿右插冇真正望過空，鞍上人只係打過一鞭都第三；今場步速快的話，形勢便似足季初一役，可一省招牌。