分手亦是朋友，大摩與貝湯美雖然已唔再係賓主關係，但兩人依然係朋友，最近大摩亦俾隻「佳騰駒」佢騎，所以呢對組合，話唔埋今季依然有頭馬交出，不過，呢個猜測是後話，目前為止，對大摩而言都係要交番好成績，有人同佢計過數，近七季大摩總獎金都過億，上季仲勁，達到一億五千幾萬，但今季同上季相比，當然冇得比，最惨就係跑咗大半季呢個倉成績都係麻麻，現時總獎金只係得七千三百萬左右，要追番過億獎金，仲要追多二千幾萬數，咁即係話大摩呢一輪唔發動攻勢都唔得，好似呢排咁大摩就搵雷神當扶手棍，呢次日賽，又搵雷神騎「軍力勁」同「共創更好」，前駒就冇乜根據；後駒擺明車馬要強配交代。
「共創更好」幕後恨贏恨到出晒面，大家仲記唔記得打吡大賽岳禮華來客串，當日大摩出隻「共創更好」跑四班千六米，臨場得五倍，結果得第十三名，岳禮華當日替大摩贏隻「勁揪」，反而「共創更好」就贏唔到，事後檢討，呢隻馬暫時草地性能唔係咁突出，所以到依家仲未能交出頭馬，不過馬房察覺到隻馬對於泥地賽似乎越來越啱跑，到目前為止，隻馬跑過三場泥地賽，兩場千八米得一亞一殿，另一場係一哩，亦可以得季軍，即係跑三次泥地全部入前四名，對於泥地性能適應得咁好，今次馬房同隻馬吼番泥地列陣，跑一哩雖然唔夠千八米咁理想，但唔好忘記，隻馬入位嗰場係泥地一哩屬第三班賽事，贏佢兩隻馬，分別係「軍炮」及「太陽旺旺」，都係跑泥地賽非常耍家馬，今次落到四班再跑呢個路程，對手弱咗一皮，騎師方面亦用上雷神，可以話強過以往啲配搭組合，大摩揚言今季要贏四十場頭馬，睇睇宜家先至廿四場，即係仲有十六場頭馬要贏，大家一見呢類實力馬強配列陣，點可以唔捧場。