下周日要跑三場大賽關係，所以留番條A跑道招呼啲外隊馬，今次破例用番上次日賽跑完嘅C+3賽道。有人會問條跑道連續用兩次，會唔會損耗得好快，呢樣嘢以前未試過，所以冇人會答到，但基本上C+3欄特色，排檔外少少都唔怕，因為蝕位冇A欄咁嚴重，亦即係講，後追馬會有較大發揮空間。不過，最穩陣都係先睇一兩場，正所謂睇定先至落注包冇俾人搵笨。呢次葉楚航派咗十一隻馬列陣，呢個倉口好少咁大陣仗，一定唔會出晒嚟陪隊，其中第四場隻四班馬「深愛」，列陣千二米，配上潘頓大家不妨一捧。點解對呢隻馬咁有信心，最主要係「深愛」曾於千四米三戰得一亞一季及一次落第，其中一場上名是在三班，輸俾「連利之星」及「牛精叻仔」，如今降低一班應該有本錢贏馬，但大家睇睇，同日之中，第四班的確有場千四米，馬房冇安排佢出戰呢場，只安排「霸勝」列陣，後者以往有表現路程係田草一千米，谷草千二米亦近過，相信目前較佳射程係一千至千二米，應該唔係千四米。倉主刻意落王牌喺「深愛」身上，也刻意替呢隻馬縮程跑田草千二米，咁嘅安排，明顯指出「深愛」呢次必有料到。再睇呢隻「深愛」跑千二米威力確實不簡單，初出即喺四班贏呢個路程，亞軍係「財高八斗」，後者現今經已上到二班，反而「深愛」搞搞吓落番四班角逐，大家揸住隻馬贏「財高八斗」呢個千二米賽績，相信今場都係勝回一仗交代嘅時候。