五月底及六月初，亞洲地區接連有多項一級賽舉行，五月二十三日新加坡有克蘭芝一哩賽，到六月三日又有日本安田紀念賽，到目前為止，收到確實消息，「川河尊駒」經已落實被新加坡邀請出戰克蘭芝一哩賽，方嘉柏亦確認隻馬會出戰，屆時配搭人選亦定咗用潘頓。至於安田紀念賽，香港有「美麗大師」出戰。其實，如果未跑上星期嘅冠軍賽馬日之前，「美麗」系亦有「美麗傳承」想報跑星洲克蘭芝一哩賽，仲有安田亦都想過參與，因為幕後認為「美麗傳承」要做馬王嘅話，贏多一、兩項一級賽會較穩陣，結果「美麗傳承」贏咗個冠軍一哩賽，相反，大熱門「馬克羅斯」就贏唔到女皇盃，所以馬王寶座呢個榮譽，「美麗傳承」應該十拿九穩。由於「美麗傳承」唔使為馬王寶座再搏，所以餘下乜嘢大錦標一級賽，幕後經已唔需要參與，消息更指出，呢仗奪冠後，馬房經已安排匹馬提早抖暑，留待下季作重新部署。
「美麗」系今季獎盃大豐收，而家族馬匹亦多數有好成績交出，好似今次周日再度開上戰線，跑第十一場三班千四米隻「美麗寶貝」，今季跑五場得三冠一亞，即使落第一仗，只是季初首戰狀態未足而敗，但亦可以跑入第四名，五場全部入前四名，呢一種就係佢哋家族風範，逢出必拚態度。「美麗寶貝」目前所贏三場頭馬，一場在四班取得，另一場跑新馬錦標，最近一仗贏三班，可以用進步神速來形容，點解咁講，因為呢隻馬最近一仗贏三班屬千二米，呢個路程對隻馬來講嫌短多少，不過，馬房似乎對呢隻馬質素睇得非常高，前仗贏新馬錦標千四米後，決定安排小休一輪，剛賽憑多少新鮮感下縮程跑短途，結果掃低初出風頭十足嘅「志同道合」，今次跑番最拿手千四米，順利取得季內第四捷指日可待。