如果問大家目前澳洲邊隻短途馬最勁，可能有人答去年贏珠穆朗瑪峰錦標嘅「紅達時」，亦有人覺得係最近連贏兩場一級賽嘅前港馬「精彩鬥士」。不過，最近喺澳洲蘭域馬場舉行嘅千四米一級賽全齡錦標，就有一匹三歲新星成功上位，就係由賴恩訓練嘅「空中藝人」喇。呢隻馬自從去年九月尾贏出一級賽金玫瑰錦標後就越戰越勇，前仗喺史密夫錦標擊敗「紅達時」，近仗擊敗「永存之城」及「表演時間」，連贏兩場一級賽，前途無可限量。既然「空中藝人」有咁出色嘅表現，幕後自然非常興奮，甚至萌起遠征英國嘅念頭，但現階段對馬主嚟講，佢哋認為出戰春季嘉年華期間嘅珠穆朗瑪峰錦標最為吸引。另外，要數目前最犀利嘅澳洲騎師，當然係去年勇奪浪琴表全球最佳騎師殊榮嘅布文喇，不過，如果要鬥贏得多一級賽，布文都要向岳禮華甘拜下風。事關岳禮華最近策騎兩歲馬「海川市」喺澳洲蘭域馬場角逐千六米一級賽香檳錦標，結果後上脫穎而出，為佢帶嚟個人第一百一十場一級賽，成為現役贏一級賽數目最多嘅澳洲騎師。另外，原來歷來贏一級賽最多嘅澳洲騎師，就係大摩嘅爸爸佐治摩亞，合共取得一百一十九場一級賽勝利，睇吓岳禮華能否於未來日子打破呢個紀錄啦。
另一方面，韋達上月中策「盈華盛甲」擊敗莫雷拉「友瑩囍」後，過終點忘形揮鞭口中念念有詞一幕，相信大家好耐冇見到，似乎現年四十六歲嘅十三少仲有一團火。講到老而彌堅，另一位南非老將勞愛德更令人印象難忘。事關呢位五十六歲嘅沙場老將，自從離開香港轉往澳洲發展後，竟然兩度成為昆士蘭冠軍。不過每件事都有完結嘅時候，勞愛德早前宣布完成今年昆士蘭嘅冬天嘉年華後就會正式掛靴，用多啲時間陪伴屋企人。另外，勞愛德亦透露目前佢嘅大仔正喺南非見習騎師學校受訓，而佢另一個囝囝亦有意做騎師，所以佢打算退休後全力協助囝囝成材。