周六沙田馬場舉行的港澳盃，客隊四匹參戰馬配搭已有安排，霑士摩亞三駒，「靠譜少爺」配高君濤、「滿貫福星」用史偉恩、「勝利巨星」配巴西好手馬雅，而李森旗下「勁威王」，將由何華麟執掌帥印。何華麟亦係現居練馬師榜第二名羅富全嘅舅仔，唔知到時會唔會有參戰馬交俾佢執韁呢？原本霑士摩亞擬由目前在新加坡發展嘅顧偉樂夥拍「靠譜少爺」出戰今屆港澳盃，可惜騎者於上周五嘅星洲賽事受傷，錯過參賽機會，前冠軍騎師高君濤成為雷霆救兵，接棒出擊。至於莫雷拉死黨兼波友馬雅，則首度來港參戰，且看這位目前高踞澳門榜首之巴西好手，能否在周末一戰為本地馬迷帶來煥然一新表現。
另一邊廂，啱啱喺冠軍一哩賽表現平平嘅「有得威」，雖然未有獲邀參加今個月廿六號於新加坡舉行嘅克蘭芝一哩賽，但亦唔代表呢隻馬冇機會喺星洲出賽，事關馬主傲風團體嘅經理人劉慶輝透露，已安排愛駒退役，轉往新加坡發展。對於突然有呢個決定，劉慶輝就話「有得威」戰鬥力絕對無退化，狀態亦好弗，並多謝姚本輝悉心訓練，可惜香港冇乜千四米嘅分級賽，如果繼續跑千二或千六米未必攞到好成績，與其浪費時間，倒不如另謀發展。至於點解揀新加坡，劉慶輝話因為當地一年都有十場左右嘅千二至千四米分級賽，佢覺得「有得威」可以多啲機會爭取頭馬，而佢亦決定安排愛駒加盟麥菲文嘅哥哥菲特文馬房。
外國馬圈消息方面，有時啲嘢唔嘗試，係唔會知結果，就算試完失敗，又唔代表要放棄。好似今年岳伯仁同埋莫雅呢對組合，為咗攻陷美國三冠大賽首關肯塔基打吡大賽，前者就親自去咗美國領軍，莫雅就放棄參與英國二千堅尼，可惜佢哋嘅「酒國琴音」出閘無幾耐被外檔嘅馬連環碰撞，結果擺唔到前走，全程食沙下遙遙包尾。不過，就算輸得咁難睇，岳伯仁就覺得當日跑泥漿地，同埋出閘無幾耐就被撞，令「酒國琴音」根本無發揮應有水準，所以佢打算安排呢隻馬先返去歐洲，年尾目標就係十一月初再次遠征美國，挑戰二千米泥地一級賽育馬者盃經典大賽，睇吓又會跑成點？作為古摩亞陣營嘅主帥，英國好手莫雅搭飛機去唔同地方策騎，絕對係家常便飯。佢美國策騎「酒國琴音」角逐肯塔基打吡大賽包尾而回後，翌日已經身在英國新市場馬場，事關佢要夥拍岳伯仁訓練嘅三歲馬女Happily出戰一級賽英國一千堅尼大賽，可惜呢匹大熱門表現唔算太突出，只能得季軍，反而由向禮倫訓練嘅Billesdon Brook，喺李輝胯下演出神勇爆出六十七倍大冷門，亦係英國一千堅尼大賽歷來最冷頭馬。