■霆鋒(左)指演出時曾被人掟水樽、熒光棒。香港文匯報訊 今日播出的節目《鋒味前奏》中，謝霆鋒教導火火「黑松露炒飯」。霆鋒炒了一會兒，交火火接手，誰知他的煎pan愈炒愈歪，之後整個煎pan離開爐，霆鋒見到笑着說：「你移咗過嚟係冇火㗎。」火火指自己好多甩漏，問霆鋒人生入面有沒有遇到過好大的甩漏、好唔開心？霆鋒說：「前一排我做咗個演出，出嚟個效果自己唔係好滿意，知道自己可以再做得好啲，一路喺架車度忟自己緊接去咗另一個活動，係煮嘢食。我一直喺度諗『點解會咁？』、『好忟呀！』，帶住呢啲怒火入廚房，即刻切親手。」
火火繼續問霆鋒行下廚這條路有沒有崎嶇、有沒有人對他冷言冷語？霆鋒坦言不止下廚，他出道頭4年已經崎嶇到不得了，「啱啱出嚟嘅時候被人噓！噓咗4年，唱到今日，我現在上台都仲會驚㗎！嘩！大佬！我嗰陣時攞住個咪，個人喺度搖，我唔係搖緊拍子呀，我係避緊你哋啲水樽同熒光棒呀！已經係被人鬧到去呢個地步，梗係見過啲水樽飛埋嚟先咁搖啦，所以有啲乜嘢未經歷過吖。」問他可曾因此落下男兒淚？霆鋒表示沒有，但爆經理人霍汶希（Mani）為此喊到豬頭，「我落台嘅時候，見到Mani喊，喊到抽搐，所以我要更堅強。」