■基仔和華仔擺出跟27年前一樣的甫士。笑基仔同是天涯淪落人 互勉不怕跌倒
香港文匯報訊 古巨基一連五場《WE我們世界巡迴演唱會-香港站特別版》前晚進入第三場，經過前一晚發生墮台意外後，基仔前晚分外小心，並叫大家不用擔心。劉德華擔任前晚的特別嘉賓，笑指他和基仔「同是天涯淪落人」：「我跌完你跌， 真係慘！」他又鼓勵基仔無論未來跌倒幾多次都好，在支持者面前，永遠都是巨人！
古巨基前晚繼續從高空離地十呎降落紅館開場，唱完第二首歌後要脫下戰士外衣，他小心吩咐舞蹈員「企過啲，企過啲」，避開當晚他出事的升降台位。而基仔眼見升降台安全降走「時光機」，他就說：「作為一個戰士梗要有啲傷嘅！仲有呀，我要喺邊度跌低，喺邊度企返起身！踩你！踩你！ 」，然後他似小朋友般搞笑報仇式狂踩個台幾下，觀眾亦歡呼支持。
墮台事件嚇倒父母
為免觀眾擔心，基仔馬上向大家報告受傷後的病情：「今晚來個病歷報告先，想大家用最放心心情去睇騷，睇咗醫生，完騷後去咗檢查。啲骨係沒事，因為向後跌，我想講真係好謝天謝地，因為跌落去時touch wood，不是個頭，係背脊。好彩背脊有啲肉咁啦，所以冇乜大礙，不過我背脊、膊頭、後面頸肩位，前面頸位都chok到，所以呢啲位都脹脹地，梗梗地，個頭唔係好轉得。不過有時唱得忘我一啲，可能可以一拂，拂到好後都得，哈哈。 又因為啲肌肉緊晒，所以可能唱高音唱到更高，所以一陣如果唱得更好聽，你就知咩事！唔好講咁多啦，來首《必殺技》試下先！」
之後，他唱到《愛得太遲》時，講到原來這三晚父母都有來捧場，「發生事真係嚇親佢哋。平日我工作係咁飛來飛去，真係好少時間可以同佢哋坐埋一齊食餐飯，我爸爸時常問我『做嘢開唔開心？』，話最緊要開心。我想借大家掌聲話畀佢哋知，好多人錫我，唔使擔心。」觀眾即掌聲雷動。
此外，前晚劉德華擔任特別來賓，兩人合唱《獨自去偷歡》之後，華仔一開口就指自己和基仔是「同是天涯淪落人，我跌完你跌， 真係慘！」，然後就笑着宣傳自己的個唱，「我冇事啦！ 我就快開演唱會！你哋一定要來睇，影張相記住， 你講大話唔來我會報復㗎！」
基仔坦言發生意外後就想：「咁點算呢， 我聽日好想同華仔哥同台唱歌......」華仔就搶白道：「我睇新聞都嚇一跳，我以為今日我要嚟唱晒𠻹！哈哈。冇事嘅 ！我咁跌都冇事，我一跌就一年，你都係一日啫！」 然後拉着基仔站台前，面對觀眾說：「我哋未來有幾多次跌倒都好，喺支持者面前，永遠都係一個巨人。 」
擺27年前同樣甫士
基仔透露自己入行做歌手，第一間唱片公司很榮幸就是與華仔一齊在藝能動音，其間華仔給予他很多鼓勵，及後在他迷惘的日子裡，華仔又給予他很多提議及力量，「我真係好多謝華仔哥，所以我特別係屋企搵返我哋第一次合照，係1991年喺清水灣電視城影的。我好想今日影你擺返同一個甫士，同我影多次合照。」
華仔看到照片就稱大家當年都一樣咁靚仔，但指他一站在基仔身邊，自己已經輸了一截，「我輸在矮。」基仔反指這不過是因為舞台服，對鞋特別高，華仔即笑言：「咁你下次借畀我！」繼而兩人擺返跟當年一模一樣的甫士合照。