香港文匯報訊 香港金像導演張婉婷日前接受內地影視公司邀請，拍攝系列導演紀錄片《逐影》，攝製隊更飛來香港取景。張婉婷導演笑言要化妝，又要在烈日下扮酷非常辛苦，深切體會演員的感受：「我記得有一次要舒淇在北京零下兩、三度河邊拍沖涼戲，仲要佢着背心又濕身，凍到不得了！當時我覺得很對不起，答應她如果拍脫衣舞場景時，我都會陪她跳！怎知道開機時又係好凍，我就話『爭住先，唔陪佢跳』。（怕唔怕舒淇記住要找數？）佢記得㗎，不過我脫衣有乜用，唔會要我跳返畀佢睇啦！」
張婉婷就話自己怕打擾朋友，所以紀錄片只邀請岑建勳、盧冠廷、羅啟銳訪問：「我都唔知佢哋想唔想講，因為我性格好怕搞住人，所以唔想叫朋友出鏡，但呢幾個人都真係好熟，所以唔傾唔得！而早兩日我哋去剪接公司拍攝個陣巧遇Mr. Fat（周潤發），佢仲即席幫我喺鏡頭前講咗幾句，真係要好好多謝佢！」張婉婷為拍紀錄片又特意重回香港大學、永利街取景：「其實我唔係好想去永利街，因為聽工作人員講永利街都已翻新，沒有昔日的味道，所以唔太想返去。（節目度會唔會爆藝人幕後趣聞？）有都唔會講啦！何況人哋都係想專注導演工作，唔係講八卦嘢！」