第六場､第三班､一六五○米。「快樂寶貝」今次渡江出戰一哩，馬房交回冷殺手祈普敦上陣，看上賽田草千四，三十六倍大冷門喺潘明輝胯下均速快跟三段，入直路亦敗不脫節，可見今仗回師窄場一哩且戰且走，慎防冷門殺攤。
第七場､第二班､一二○○米。「順勢寶」來港已三季，在賽事中一再得到驗證，性能乃正宗谷草短爆型後上馬，無論快慢步速，喺直路總會交到一段強悍變速力，只要遇啱形勢，決不容易有對手可予抵擋牠的後勁，今次相隔上場只有十幾日時間，由田草一千回師窄場千二米強項，配李寶利排靚位起步，當屬半冷門之選。
第八場､第三班､一二○○米。「餘皇」季內七戰唯一上名喺谷草千二米，該役不敵「百步穿雲」兩個多馬位得第三，而後駒再出輕鬆連捷，足證呢場三班千二水準絕對唔差；而今仗改配黃俊七日後匆匆再戰，由於跑得密復操以慢踱為主，加上馬房剛戰爆出「包勝」打破悶局，且看今賽可否締出佳績。