季尾階段唔少未交代馬要執番W才抖暑，蔡約翰馬房的「激賞」，熱夠身後今戰轉來谷中千二米上陣，查月初刻意渡江試課谷閘勝出。馬主馮慶延斷斷續續在港養馬廿多年，早期有「讚賞」與澳洲籍練馬師白理維及夏志信合作，亦有「讚揚」及「原動力」跟希斯攜手五捷，自此改與不同國籍的練馬師合作，如霍利時、呂健威、蘇保羅、苗禮德及徐雨石，期間有「飛擒」及「靚無敵」各只贏過一場，今以接近千萬港元買入外地兩戰全勝「激賞」，並交由蔡約翰主理，看來志切捲土重來，選擇馬房前也經深思熟慮。事實上，馮慶延與澳洲馬圈中人較有淵源，經手馬販Chris McAnulty之父Rob McAnulty，於九十年代初在港相當活躍，亦是「歡笑」系馬主林文彬販馬夥伴，當時正值馮慶延初在港養馬，自此種下關係至今，如今「激賞」為Chris McAnulty另一高價成交，今次打王牌轉場似乎已蠢蠢欲動。