雷神自宣布唔喺香港玩，雖然佢話會全力爭冠軍，不過，潘頓就受到好多人嘅支持，除鄉里練馬師外，仲有一啲希望潘頓攞冠軍嘅人士，大家細心諗一諗，假如香港冠軍俾人撬咗去日本跑，香港馬迷又好，香港馬會又好，點會有面，當然，雷神攞唔到今屆冠軍，即使去日本，香港馬迷或馬會都唔會咁冇面，相信好多馬主都會係咁諗。
睇睇今次日賽，潘頓又手握重兵，要贏兩三場真係唔難，反而雷神手上兵力明顯較遜一籌，蔡神仙亦好似收夠籌咁，所以雷神要爭取頭馬，應該好難。潘頓呢位澳洲騎師，話明有鄉里支持，好似蘇保羅咁，隻「白鷺飛翔」（圖前駒）明明由田泰安騎開，上場開始交俾潘頓上陣，結果冇令幕後失望，順利以大熱門姿態贏馬，以往呢隻馬喺田泰安胯下，例牌要飛出外檔衝，但睇番潘頓贏「白鷺飛翔」，全程居馬群中間位置，轉入直路在馬群穿插而上，結果輕勝第二名馬「加州再豫」個多馬位，假如潘頓用番田泰安嘅策騎方式發揮「白鷺飛翔」，轉彎掟出大外檔，肯定會輸俾「加州再豫」呢類千四米強敵。今次除咗「白鷺飛翔」再出戰千四米外，同組蘇保羅仲有隻「智愛」報名，不過「白鷺飛翔」屬第一選，「智愛」是第二選，故「智愛」只能列為後備。其實今季「智愛」嘅表現亦非常出眾，喺四班贏得三場頭馬，其中兩場屬千四米，最近一仗就係喺呢個路程取得，假如列為正選嘅話，憑輕磅及大勇狀態，已有能力拚勝，不過，「白鷺飛翔」屬三班頂馬，用咗潘頓後威力更強，無理由唔益鄉里，幫助佢攞個冠軍，所以呢隻「白鷺飛翔」純粹從部署角度嚟睇，呢次擺明係添食格，賠率方面雖然稍為熱啲，但大家唔使擔心鬥志如何，今個禮拜六，一於搵潘頓坐騎作為優先追捧目標。