■蟲炎喺自己fb分享反對派議員缺席投票統計圖表，仲抽埋「自己友」水。 fb截圖反對派中人要令自己「鶴立雞群」，從來唔係集中show自己點叻，而係話其他人幾差，就連「自己人」都無面畀。話說「自決派」立法會議員區諾軒，俾人鬧缺席會議偕妻遊日本，結果小學雞上身去人哋fb罵戰，結果有其他網民睇唔過眼，製圖一次過踢爆除咗區諾軒外，公民黨嘅郭家麒、街工梁耀忠（白頭佬）同「專業議政」梁繼昌原來都是「關鍵缺席」嘅慣犯。喺立法會九龍西補選落敗嘅「瀆誓四丑」之一蟲炎（姚松炎）突然「神助攻」，喺自己fb地球share咗呢張圖，仲抽水道：「我榜上無名，係咪代表從未因我缺席而由贏變輸？」
■香港文匯報記者 陳川
話說近日同區諾軒罵戰仲俾對方「恐嚇」、撐「獨」嘅中文大學講師劉正，佢喺坉耖b專頁「無神論者的巴別塔」度引用咗網民「Stephen Wong」同「Chi Ho Chan」整嘅兩張反對派議員缺席投票統計圖表，特別係因為佢缺席而「反勝為敗」嘅表決。
廣傳缺席記錄 「獨」師火併區軒
劉正喺該帖文中話，喜見「吾道不孤」：「愈來愈多人都發現好多口口聲聲守護香港嘅飯（泛）民，其實都係唔開會唔投票嘅大懶蟲，......你會發覺郭家麒、梁耀忠和梁繼昌原來都是慣犯，小賊頭區諾軒雖然當選短短幾個月，已直迫老油條前輩。」
佢仲話這些圖表其實還未完善，「例如尚未加入林鄭致謝動議、兩屆財委會撥款、亞投行撥款之類，張超雄譚文豪其實都有多次缺席紀（記）錄，尤其是後者；真正配得上『合格議員』4字的，其實就只有陳志全與朱凱迪（廸）二人。希望網友間共同努力，跌爆飯（泛）民大騙局。」
唔知係咪蟲炎仍然將補選落敗原因歸咎喺傳統反對派當時冇全力助攻，定係覺得自己咁「高質素」竟然選唔到，其他人就輕輕鬆鬆月袋10萬而唔忿氣，佢喺自己fb轉發咗劉正成個帖，仲抽水話：「我榜上無名，係咪代表從未因我缺席而由贏變輸？」
蟲粉批反對派當市民無腦
蟲炎嘅支持者就加把口。「Betty Chu」話：「應該繼續努力監察，開會、投票是最基本的，否則何以抗爭，姚教授省下班『泛民』啦！次次含淚投票，最後索性唔投！」
「Yuenx Yuen」就話：「『泛民』真係令人失（望），當市民傻的嗎？民主黨，公文（民）黨，我唔會再投啦，完全無政治智慧。」「Dhename Dhe」直言：「同嗰班輪流缺席開會缺席投票的『泛民』，一齊團到乜嘢結？ 橫洲單嘢又係因『泛民』缺席！」
喺蟲炎「加持」下，劉正又發帖喇，話自己轉載嗰兩張圖片，在網絡小規模瘋傳，仲乘機擦吓蟲炎鞋：「連姚松炎教授都一邊轉載一邊自嘲，響表上面無佢個名係咪代表佢在任時無任何一個議案因為佢缺席反勝為敗─經我驗證，至少響我檢閱過嘅議案入面，又的確真係無。」
佢話鋒一轉，向在立法會新界東及港島區補選勝出、袋袋平安九萬六的兩個反對派「政棍」開炮：「一個JapJap聲食緊梁天琦人血饅頭（范國威）會都唔開、另一個仲響我質詢佢（區諾軒）偷懶嘅時候恐嚇番（返）我轉頭，真係做嘢果（嗰）個竟然選唔番（返）入去，都真係夠哂（晒）諷刺！」
網民插鴿訟滅聲當無事
「Yau Pan Chan」就建議：「喺我地（哋）個竇到po，盲黃都係唔會睇到......真係要直接拎呢啲圖加句caption派云（勻）民主公民兩大黨fb啲po先有意思......」劉正就回應：「睇倒（到）都無用，佢地（哋）唔會接受現實，佢哋直接話你抹黑。」
「Rico Tse」就講出自己嘅親身經歷：「我之前問左（咗）楊岳橋3次重（做）咩缺席投票，就比（俾）佢block左（咗）冇得留言，請問可以點監察佢地（哋）？其他『泛民』一樣衰，一係刪留言，一係就唔答。」「Stephen Wong」亦都話：「民主黨個page都係delete人留言。」