世界盃開鑼，相信不少馬迷的焦點將轉移到世界盃賽事，上星期三適逢馬會沒有安排本地夜賽，反而轉播四晚英國皇家雅士谷賽事，雖云皇家雅士谷精彩緊湊，將有不少一流佳駟亮相，但世界盃始終四年一度，馬迷兼球迷要二選其一，吸走不少馬迷是必然的。足球是競技大於一切，記得已故阿叔林尚義之金句：「波唔係要嚟賭嘅！」但如果足球沒有了賭博元素，相信仍會有七八成人會留意足球；相反若賽馬沒有賭博，有興趣留低看賽馬的，可能只剩不足一成。諷刺的是，近年不少人的心態是，寧願賭波也不想賭馬，原因十分之簡單，因為賭波好易中，上下盤及主客和二分一或三分一機會命中，賭馬難玩且易輸錢，這事實不能否定，但如果這是全球大勢所趨，賭馬人越來越少，則賽馬未來發展必有危機。翻查賽馬的起源年份比足球早近一百年，若論兩者廣泛性，當然是足球比賽馬更廣泛。深想再過半世紀或一百年後，四年一度世界盃繼續舉辦機會仍樂觀，相信足球依然是最受歡迎運動；至於純種賽馬，只待三五十年後的今天，延續性或者仍是有的，但對比起今天是否已明日黃花？以現時趨勢來看，似乎機會不低。看完今年皇家雅士谷的賽事，可以見得英國馬會對於保養場地的確有一手，當然比較時間和沿用沙網草的香港是無得比，但在一星期跑六天的情況下，其天然草場地直到最後一晚直播看鑽禧錦標時候，仍然是一片綠油油，可見保養確實是有一手。不過太快的場地，對於歐洲馬來說，又不一定是最佳發揮的環境，看今年多場賽事都打破了賽事紀錄時間，實在有點擔心這批馬之後，是否可以延續得到整個夏季賽期，不過看到愛駒能夠在女皇面前上陣，甚麼都值回票價了！
另一方面，上周日前馬王「明月千里」（圖13號）遠赴日本及時復甦，差啲贏日本寶塚紀念。呢場阪神馬場嘅二千二百米一級賽，當地賠率十四倍嘅「明月千里」十三檔起步，一路留在最後三位之內，喺騎師布文胯下留得極之舒服，入直路拉出大外欄，一氣衝上嚟勢頭好勁，一度以為贏得，但去到最尾數步「明月千里」稍慢，始終追唔過日本代表「覓奇火箭」，最終騎師和田龍二捧走呢場總獎金二億九千萬日圓大賽，亞軍「明月千里」執四百三十萬港元，雖敗猶榮。早前其實「巴基之星」練者告東尼都有透露，話有意跑呢場日本一級賽，可惜最終未能成事，依家前馬王「明月千里」都差啲贏，如果「巴基之星」過去跑，有機會殺低一班日本馬呢。
