跑馬嘅嘢，有時練馬師話事，有時騎師亦可以俾吓意見，馬主如果有番咁上下分量，亦都可以左右倉主部署思維。好似沈集成馬房隻「動力飛鷹」，較早之前馬房安排跑中距離，可惜成績唔係咁理想，有次練馬師部署隻馬跑田草千八米，並用史卓豐一試，結果得亞軍，輸俾頭馬「非常堅」唔夠一個馬位。自此史卓豐便認定隻馬跑千八米係最佳出路。當然，史卓豐呢番說話並唔係假，因為「非常堅」乃打疊贏咗兩場田草千八米，較早一場贏「上浦福滿」，呢場仲破埋三班紀錄時間，「動力飛鷹」輸俾隻班際紀錄保持者，反映本身係有本錢在此班建功。由於騎者表示對呢隻馬長力有信心，於是往後日子「動力飛鷹」一口氣再跑三場千八米，結果全部敗陣而回。
由於一次又一次輸到幕後人怕怕，練馬師亦無說話好講，唯有將呢隻馬報番中距離路程，今次所報跑谷草一哩，路程應該更合適，因為呢隻馬來香港前喺紐西蘭跑咗三仗，全為千四米，得兩冠一亞，千八米能上名，並唔代表有能力贏馬，呢次縮程跑一哩，馬房估計比起跑千八米會更有信心。正如之前所講，倉主聽從史卓豐嘅意見，連續安排呢隻馬攻千八米，但最終證明並唔係之前所諗嗰回事，呢次轉跑谷草一哩，自然要飛起史卓豐，用其他騎師來印證，結果馬房搵梁家俊幫手，希望用佢拚個明白。雖然跑馬地屬「動力飛鷹」第一次角逐嘅場地，季初呢隻馬曾經試過一次千二米谷閘，由柏寶考驗，走位係3-7-5，唔算走得太差，跟住主馬群一齊過終點，輸約四個馬位俾該課大閘頭馬「同明相照」，所以估計谷戰亦合腳法，再睇佢同父馬如「勇冠王」，屬谷戰一哩能手，估計呢隻馬今次向窄場發展會有一番作為，大家千祈咪當呢隻馬冇料到。